Претходен број

Вистинска расправа во Собранието

Најдоверливите остануваат клучни играчи на премиерот Груевски

Билјана Јовановска

Петочната седница на Собранието на која се расправаше за министерските оставки и за разрешувањето на Трајко Славески, бездруго ќе остане забележана како една од најинтересните во овој мандат. Се слушнаа квалитетни дискусии, главно, од опозицијата, на која ова и' беше едно од најсветлите изданија, додека дефанзивноста на ВМРО-ДПМНЕ беше разбирлива.

На пратеничката група воопшто не и' беше лесно - се најдоа во небрано - како да го критикува својот министер Славески, кој згора на се' е и трет човек во партијата, а за кој колку до вчера полна уста пофалби имаше и премиерот Никола Груевски. Затоа, дискутираа два-тројца пратеници, колку да не е без ништо, додека другите се фокусираа на реплицирање, иако и тоа не го правеа многу успешно. Неспорно е дека дури и со неубедливите реплики придонесоа во создавањето на атмосфера каква што одамна немало во парламентот.

Нервозата беше забележлива и кај власта и кај пратеничката група на ВМРО-ДПМНЕ. Во собраниските холови и самите вмровци загрижено си коментираа дека „оваа смена може партијата скапо да ја чини“. Зашто по разрешувањето на Трајко Славески, работите стануваат појасни и дефинитивно паѓаат маските, вклучувајќи и на ексминистерот, кои тврдеа дека светската економска криза ќе не' заобиколи, дека нема да ја почувствуваме... Конечно, се потврди она што неофицијално се говори - дека државата е пред банкрот, без оглед на шарените приказни и бескрајните самофалби, со кои ја удавија јавноста.

Додека премиерот, објаснувајќи ги причините за разрешувањето на Славески, меѓу другото, соопшти „дека предлогот за промена на министерот за финансии не е заради неспособност, а уште помалку поради некакви предлози, кои ги давал, а јас сум ги одбивал околу ребалансот и слично...“, од министерот во заминување го слушнавме спротивното. Освен тоа што пластично го објасни начинот на функционирање на Владата на Груевски - „само мртви риби пловат единствено по течението на реката, јас се трудев да бидам глас а не ехо, и живо суштество, а не предмет кој го движат“, не' соочи со реалноста. Славески ги предупреди пратениците дека „по втор пат предлагал ребаланс на буџетот и оти државната каса мора да се скрати за сто милиони евра“. Значи, сепак, нешто било предлагано, а на шефот не му се допаднало.

Ќе има ли Груевски сега повеќе слух за ова прашање? Од она што се слушна во парламентот и од министрите - тешко. Не случајно со финансиите ќе раководи човекот од „ударната четворка на премиерот“, а оние другите, горе-долу анонимни, нема да брануваат. Со изборот на Зоран Ставрески, кумот на Груевски, премиерот потврди дека навистина се' е под контрола на „фамилијата“, чии членови се и браќата Мијалкови. Едниот е сива еминенција во полицијата, за многумина тој е министер во сенка, а вториот ги држи конците во Царината. Така, Ставрески, кој би требало да ја спасува државата од банкрот, прашан во интервјуто на А1 телевизија дали ќе го послуша апелот на Славески за ребаланс на буџетот, изјави: „Од понеделник подетаљно ќе ги разгледам стручните служби и сите состојби во буџетот и ќе ја информирам Владата“. Значи ли ова дека Владата не знае за алармантните состојби.

Она што се' почесто се говори - дека до 25 јули ќе се случи уште една чистка во Владата, Груевски го демантираше, но така било и со многу други работи кои подоцна се покажале како точни. Јасно е дека и одделни министри на ДУИ на Али Ахмети многу лесно можеа да се најдат на листата на отпишаните, но барем во овој бран смени премиерот не се осмели да ги чепне. Не затоа што е задоволен од нив, велат, туку заради фактот дека во тој случај ќе биде исправен пред многу поголеми барања за поатрактивни ресори. Неофицијално, во ДУИ се говори дека во случај на смена на нивните министри, своето останување во кабинетот на Груевски, ДУИ и Ахмети ќе го условат со добивање на министерствата за надворешни работи и за правда.

На петочната собраниска седница најнезабележливи беа идните министри. Паднаа во сенка на жешките дискусии, а и што би се зборувало за луѓе, кои и не и се којзнае колку познати на јавноста. Меѓутоа, еден од оние министри со кои Груевски ќе го „зајакне“ владиниот брод, самиот се погрижи да отскокне од другите. Никола Тодоров, кој ќе раководи со исклучително чувствителниот ресор - образование и наука, се самопромовираше како полуписмен човек. Министерот кој треба да се грижи за описменувањето на најмалите и за образованието на нацијата, во својата биографија на нецели две страници, направил повеќе од 100 грешки и спротивно на Уставот, кој пропишува дека во Македонија официјално е кирилското писмо, половината му беше напишана на латиница! (Б.Ј.)