Се готви заемно оценување на универзитетите

Билјана Јовановска


Ако Владата ги усвои предлог-измените во Законот за високо образование, нашите универзитети ќе се најдат во ситуација меѓусебно да се оценуваат.

Министерот Никола Тодоров изјавува дека тоа е „европската практика на надворешно оценување што ја применуваат дваесетина еврочленки“.

Но, на Универзитетот „Св. Кирил и Методиј“ тврдат дека за вакво нешто не слушнале и дека тоа е мешање баби и жаби. Неколкумина еминентни професори, кои побараа да останат анонимни, сметаат дека оценувањето едни со други би отворило многу прашања и дилеми. Згора на се', заемната евалуација никаде не фигурира во Законот за високо образование и ова што сега се иницира, практично, нема никаква законска основа.

Неофицијално, околу 200 професори од најстариот државен универзитет предаваат на други државни универзитети. Оттаму, прашање е на кој универзитет, на пример, ќе се оценува работата на еден професор, кој поради спецификата на својата потесна стручност и дефицитот на кадри, предава уште на два други државни универзитета? На матичниот или на оние на кои е хонорарец? Нејасно, е исто така, каде што ќе бидат евалуирани нивните научни трудови - на сите универзитети на кои предаваат или, пак, и оценките може да варираат, па на еден факултет, според ставот на професори од „конкуренцијата“, нивниот колега да добие слаби оценки, на друг - одлични. Универзитетските професори, кои зад себе имаат огромно искуство, не слушнале за ваков начин на надворешна контрола и не веруваат дека такво нешто може да дадев плод.

Ако Министерството навистина сака да го зголеми квалитетот на високото образование, тоа може да го стори многу едноставно - со примена на членот 74 од Законот за високо образование. Во него многу јасно пишува дека „Евалуацијата на универзитетите ја врши Агенција за евалуација како самостојно тело, составено од 11 професори, кои се избираат со мандат на четири години, а конститутивната седница ја свикува министерот надлежен за работи во високото образование“.

Дознаваме дека меѓународна евалуација има само Универзитетот „Св. Кирил и Методиј“. Поточно, тој поминал веќе низ две надворешни евалуации, а третата, наводно, е закажана за април и тоа со експерти од Европската асоцијација на универзитети. Тоа е постапка што чини, некои велат, доста скапо, меѓутоа, е и единствен начин некој однадвор да го процени квалитетот на услугите што ги даваат професорите на државните универзитети.