Одделот реновиран, првата трансплантација неизвесна

Промовиран одделот за интезивна нега со капацитет за 250 деца годишно

На Клиниката за детска хирургија вчера беше промовиран реновираниот оддел за интезивна нега со капацитет за 250 деца годишно. Но, неизвесно е кога ќе проработи, зашто засега нема ни доволно кадар, но и пари за негово функционирање. Со ова се доведува во прашање и стартот на првата трансплантација на црн дроб и бубрези кај децата што го најавија стручњаците за почетокот на идната година. Во меѓувреме, и натаму продолжува практиката оперираните деца кои имаат потреба од интензивно лекување да мора да се шетаат до други клиники и да се сместуваат на интезивна нега на КАРИЛ и на Детската клиника. „Од 125 точки што требаше да ги направиме за да може клиниката да ги прави најкомплицираните операции, па и трансплантации, е отворањето на одделот за интензивна нега кој денес се промовира. Но, за да профункционира одделот, треба да се дефинира уште колку и каков кадар е потребен“, посочи д-р Владимир Чадиковски, претседател на Националната фондација за трансплантација.

За да може да ги изведуваат и најсложените операции, од клиниката не знаат дали Фондот за здравствено осигурување ќе им даде повеќе средства годинава. Буџетот на клиниката изнесува околу 46 милиони денари, а клиниката должи околу 22 милиона денари. Само за режиски трошоци, на клиниката месечно и' требаат околу еден милион денари.

Одделот за интезивна нега беше реновиран и опремен со 2,6 милиони денари донации од поединци и компании собрани во хуманитарната акција „Можеш ако сакаш“, организирана од холандската амбасада и од Националната фондација за трансплантација. Од државата одделот засега има добиено само еден ехо-апарат, иако министерот за здравство Бујар Османи најави дека од големиот тендер ќе бидат обезбедени и други апарати.

Амбасадорката Симоне Филипини, нагласи дека акцијата продолжува со донацијата од американското Министерство за одбрана и законот за трансплантација, кој е во владина процедура. (Ј.Ј.)