Болните на клиниките два часа без појадок

Болните на клиниките вчераутро околу два часа останаа без појадок. Ова беше кулминација на неколкумесечните проблеми со плаќањето меѓу фирмата „Хацат“, концесионер на клиничката кујна и фирмата-плаќач на клиниките – „Заеднички служби“. За да не пукне срам во јавноста и пациентите да не останат без храна, „Заеднички служби“ помогнале, обезбедувајќи половичен појадок. Наместо печиво и напивка, на клиниките им биле испорачани само кифли. Појадок испорачала и „Хацат“, но предоцна, па го вратиле назад. По интервенции и закани од Министерството за здравство за раскинување на договорот, дистрибуцијата на храна продолжила и болните навреме добиле ручек.

„Хацат“ одлучила да не испорачува храна откако годинава неколку пати клиниките биле предупредени за нередовно плаќање и за зголемување на долгот. Секогаш кога ќе се појавеше проблемот, поголем дел од директорите на клиниките се чудеа како не плаќаат кога „Заеднички служби“ редовно добива пари. Но, се' уште е тајна дали „Заеднички служби“ целосно и' ги префрла парите на „Хацат“. Концесионерот на клиничката кујна не открива колкав е долгот. Но, оттаму велат договор не се раскинува само за неиспорака на храна, туку и за неплаќање долгови над 15 дена.

Проблемот се обиде да го реши и министерот за здравство, Бујар Османи, но не успеа, па се закани со раскинување на договорот со концесионерот или, пак, враќање на кујната на „Заеднички служби“. Тој рече дека никој не смее да се служи со уцени.

„Поведуваме постапка со можност за раскинување на договорот, а има многу алтернативни опции. Или враќање на кујната кај ’Заеднички служби‘, тие да прават храна за пациентите или секоја клиника посебно да ангажира доставувач за храна. Меѓутоа, нема да дозволиме никој да игра со пациентите. Договорот кажува јасно и прецизно дека не смее ниту еден оброк да задоцни, бидејќи со тоа тој автоматски се прекинува“, објасни Османи. Но, ни министерот не откри колку „Заеднички служби“ е задолжена кај „Хацат“. (Ј.Ј.)