Вознијацки брутално ја прегази Дементиева

Се одиграа првите три меча на годинашниов завршен турнир на најдобрите осум тенисерки, ВТА-шампионатот, кој се игра во Доха на тврда подлога со награден фонд од 4.55 милиони долари.

Турнирот со победи го отворија двете тенисерки со најдобра форма во вториот дел од сезоната, воедно и двете првопласирани тенисерки на ВТА-ранг листата во овој момент - Каролина Вознијацки и Вера Звонарева.

Вознијацки за само 53 минути минати на теренот ја декласира 29-годишната Русинка Елна Деметиева со 6:1 и 6:1. Данката загуби само осум поени во текот на своите седум сервис гемови, а дури пет пати ја брејкна бившата олимписка победничка, и стигна до својата 60. победа во оваа година, односно 31. во 33. последни двобои.

Австралиската тенисерка Саманта Стосур ја совлада Италијанката Франческа Скијавоне со 6:4 и 6:4 во вториот меч од првата група.

Русинката Вера Звонарева пак, исто како и Вознијацки беше доминантна во мечот од втората група победувајќи ја Србинката Јелена Јанковиќ со 6:3 и 6:0.