Сепак, ќе ги бараме парите од ММФ

Во игра е повлекување минимум 400 милиони евра,
а не се отфрла и можноста за издавање нова еврообврзница

Александрија Стевковска


Македонија е чекор до одлуката да го прифати понудениот отворен кредит од Меѓународниот монетарен фонд. Во игра се минимум 400 милиони евра, првично понудени со кредитната линија на Фондот, а можно е да се повлечат и повеќе пари. Тимот на мисијата на ММФ, предводен од Вес Мекгру, е веќе во земјава и се водат интензивни разговори со нашите власти за деновиве да се обелоденат деталите за договореното, посебно износот на парите што Владата ќе ги земе од Фондот.

„Очекуваме во следните неколку дена да се завршат разговорите околу новата кредитна линија и да се донесе одлука. Можам да кажам дека сме се' поблиску до донесувањето одлука за користење кредитна линија од ММФ што е по исклучително поволни услови. Во тој контекст, практично она што се нуди од нивна страна и она што е генерално правило за ваквите кредити е што земјата може во првата година да користи 500 отсто од квотата, односно за Македонија тоа би значело 400 милиони евра за првите 12 месеци“, изјави вчера вицепремиерот и министер за финансии Зоран Ставрески.

Тој потврди дека Владата размислува и за продолжен кредит од 24 месеци со што сумата на кредитот може да биде многу поголема од првично најавените 400 милиони евра. Кредитот би бил земен со каматна стапка од 1,3 отсто во првата година или од два до 2,1 отсто доколку се земе кредит за 24 месеци.

„Парите ќе бидат искористени за буџетска поддршка, со оглед на тоа дека ММФ оваа кредитна линија ја понудил без наметнување услови за што би се користеле овие средства. Доколку се земат овие пари тие ќе се користат за поддршка на буџетот. Поточно ќе претставуваат сигурност дека ќе бидат реализирани сите проекти што се предвидени за следната година, меѓу кои спаѓаат и капиталните инвестиции“, истакна Ставрески.

Ставрески нагласи и дека реализирањето на оваа кредитна линија би значело релаксирање на стопанството, бидејќи во него би останале повеќе пари од банкарскиот сектор.

„Со парите од ММФ ќе се намали потребата на Владата за повлекување пари од банкарскиот сектор преку издавање државни записи“, додаде Ставрески.

Според него, земањето кредит од ММФ не ја исклучува можноста Владата да издаде еврообврзница.

„Ако се земат парите од Фондот ќе се подобрат условите за издавање еврообврзница, бидејќи таа би била со пониска камата, а воедно ќе се подобри угледот на нашата земја кај потенцијалните инвеститори“, додаде Ставрески.