Струмичките земјоделци не сакаат пари од ИПАРД

Струмица - Струмичките земјоделци и сточари не покажуваат интерес за користење средства од ИПАРД-програмата. Според нив, процедурата за пристап до овие средства била мошне комплицирана и преоптоварена со документација и административни барања, а критериумите за аплицирање многу високи и можеле да ги исполнат само земјоделци што имаат готови финансиски средства и капацитети и кои со овие средства можат да го модернизираат своето производство и да го доближат до стандардите на ЕУ.

Во Федерацијата на фармери, исто така, сметаат дека средствата од оваа кредитна линија се достапни претежно за големите стопански субјекти, наспроти фактот дека во Македонија е најголем бројот на мали и средни земјоделски производители, преработувачи на зеленчук и на овошје и одгледувачи на добиток и живина.

„За средствата од ИПАРД можат да аплицираат земјоделски производители, одгледувачи на добиток, овоштари, градинари, лозари, преработувачи на зеленчук, овошје и на млечни производи, кланични капацитети, нови собирни центри за млеко, како и апликанти што ќе воведат еколошки стандарди за третирање на отпадот од кланичната индустрија. Да се добијат средства од овие фондови и успешно да се имплементираат значи да се добие европско обележје и ознака на инвестицијата, што натаму му дава дополнителна конкурентска способност на оној што инвестира“, велат од Подрачната единица на Министерството за земјоделство во Струмица.

Во сегашната транша, за која рокот за поднесување апликации истече пред една недела, на располагање има, заедно со буџетското кофинансирање, вкупно 40 милиони евра од европските претпристапни фондови за рурален развој. Во претходната линија од 122 апликации на ниво на државава, од Струмичко

само еден фармер има потенцијална можност за добивање средства од оваа програма. (МИА)