Сметките на „Т-мобиле“ на банкоматите на Стопанска

Стопанска банка, „Македонски телеком“ и „Т-мобиле“ вчера промовираа нова е-услуга, со што на своите клиенти им понудија електронско плаќање на сметките. Тоа значи дека ќе можат да се плаќаат месечните сметки за Интернет, телефон и телевизија преку Интернет и преку мрежата на банкомати на Стопанска банка.

„Сакавме на граѓаните да им го зголемиме изборот кога станува збор за плаќањето на сметките. Нудиме услуги што ќе бидат достапни 24 часа за граѓаните, кои, секако, ќе ни донесат позадоволни клиенти, кои секогаш ќе бидат први на ред“, порача вчера Ратка Неделковска, советничка за односи со јавноста на Стопанска банка. Според неа, електронското плаќање се врши лесно и едноставно, без провизија и дополнителни трошоци. Потребен е само интернет-пристап до веб-страницата на „Мој телеком“ и платежна картичка од брендот на „мастеркард“ и „виза“, кои се користат за електронско плаќање. „Брендот ’Т-мобиле’ уште еднаш ја изрази својата иновативност преку промовирањето на новите електронски услуги во соработка со Стопанска банка, а во согласност со барањата на корисниците, да овозможиме брз едноставен и сигурен начин за плаќање на сметките“, изјави Верче Георгиевска-Рупиќ, портпарол на „Т-мобиле“. Оваа услуга можат да ја користат сите граѓани при плаќањето на нивните пост-пејд сметки. (Ек.Р.)