Мелничарите се пишманат околу цената на пченицата
Лебното жито ќе се плаќа од 10 до 12 ден. за килограм, ако се намали нелегалниот увоз на брашното
Александрија Стевковска
Мелничарите ќе ја откупуваат домашната пченица по цена од 10 до 12 денари за килограм, само доколку државата успее да го намали количеството брашно што легално и нелегално се увезува од соседството. Земјоделците се закануваат дека во случај ако откупувачите не се придржуваат до договорената цена за плаќање на пченицата, тие ќе ги радикализираат протестите, кои засега се ставени во мирување.
„Остануваме на договореното под услов Владата да го реализира ветеното, максимална контрола на брашното и на пченицата што се увезуваат од аспект на квалитетот и поседувањето потребни документи и сертификати. Доколку ги видиме ефектите, во делот на намалување на легалното и на нелегалното внесување брашно од Косово и од Србија, ако се ослободи пазарот, ние сме подготвени да ја дадеме ветената цена“, вели Николчо Георгиев од „Мак млин“. Според него, има информации дека нелегално се внесува брашно.
„Треба да почнеме да склучуваме договори за откуп на пченицата. Ќе настојуваме да им помогнеме на нашите производители, но и ние мораме да внимаваме да го пласираме домашното брашно“, истакна Георгиев. Преработувачите го оправдуваат намалувањето на цената со вишокот брашно, кое е увезено од Србија и од Косово.
Производителите, пак, се пожалија дека дел од мелничарите веќе се двоумат во однос на договорените 10-12 денари за пченицата, а за јачменот немало, како што рекоа, никаков интерес.
„Жетвата почнува, цената е договорена, но ако бидеме изманипулирани, ако не се испочитува нашето барање, од 10 до 12 денари за килограм лебно жито, по 15 јули ќе ги интензивираме блокадите во сите регион��“, напомна Марјан Гулев, претставник на земјоделците, кои протестираа пред две седмици.
Доколку пекарите останат на ставот дека нема да дадат повеќе од седум денари за килограм јачмен плус данокот на додадена вредност, тогаш, рече Гулев, идната година никој нема да посее ниту зрно од оваа култура.
„Некои мелничари ги повлекоа цените за пченицата што ги дадоа минатата седмица, а сега нудат осум денари. За јачменот не постои никаков интерес. Ни понудија шест денари и отплата на осум рати, што е смешно и потценувачки“, се жали Џидан Тајровски, земјоделец од Велес.
Сојузот на земјоделците ги поддржува барањата на производителите дека откупната цена на житото треба да се движи од 10 до 12 денари за килограм, во зависност од квалитетот. „Мора да потенцираме дека цената ќе зависи од квалитетот на пченицата. Не може за неквалитетна пченица да бараме 12 денари“, изјави Никола Стаменов од Сојузот на земјоделци. Според Стаменов, бидејќи јачменот не спаѓа во доменот на мелничарите, за неговиот откуп треба да се зборува со сточарските фарми. |
