Безобразниот конгресмен даде оставка
ЊУЈОРК - Повеќе не толку пркосен и не толку воинствен, конгресменот од Њујорк, Ентони Вајнер, во четвртокот трезвено ја објави својата оставка од Конгресот, потклекнувајќи на бесот во јавноста предизвикан од онлајн-разговорите набиени со сексуална тематика со поранешна порноактерка и други жени.
Лидерите на Демократската партија, загрижени дека Вајнер би можел да ја повлече партијата надолу на изборите во 2012 година, ја поздравија објавата по неколку дена минати во обид да го присилат, притиснат и, конечно, да го принудат каприциозниот 46-годишен конгресмен да се повлече. Познат како дрзок, либерален и амбициозен, Вајнер се кандидираше за градоначалник на Њујорк во 2005 година и се очекуваше да го повтори истото тоа. Тој го служеше седмиот мандат во Конгресот.
На настапот во Бруклин, што привлече дофрлувачи како и поддржувачи, Вајнер се извини „за личните грешки што ги направив и непријатностите што ги предизвикав“, особено кон својата сопруга Хума Абедин. Бремена со нивното прво дете, таа не беше тука како што беше пред десет дена, кога Вајнер прв пат призна дека испраќал недолични пораки и фотографии до жени преку интернет откако првично категорично негираше дека направил такво нешто. (АП) |
