Српските новинари во Ал Џезира мора да го признаат Косово
Директорот на Ал Џезира, Горан Милиќ, на интервјуто за вработување новинари во Ал Џезира Балкан ги праша српските новинари дали Косово е држава и бараше одговор - да, пишува во вчерашниот број на српскиот „Прес“.
Милиќ изјави во разговорот за весникот дека тоа се прави затоа што мора да се знае како размислуваат н��винарите. „Поаѓаме од реалноста на овој простор дека еден одреден број држави го признаа Косово, а одреден број не го признаа“, вели Милиќ, додавајќи дека го поставуваат и прашањето дали во Либија се случува борба за демократија или војна за уривање на режимот на Гадафи.
„Имаме јасно утврдени стандарди, ова ќе биде телевизија во која новинарот не ги коментира настаните, туку пренесува суви вести и информации, а настаните ги коментираат признати интелектуалци и аналитичари, каде што секогаш ќе настојуваме да имаме два агла на гледање“, изјави тој.
Српскиот „Прес“ пишува и дека Ал Џезира му понудила на Жељко Митровиќ за 25 милиони евра да им ја продаде телевизија Авала. На овој начин преку националните фреквенции во Србија би одела програма на регионалната мрежа Ал Џезира Балкан, која наскоро треба да почне се емитување. (Индекс.хр) |
