Стоп за гостинските навивачи

Кошаркарската федерација на Македонија по теркот на Фудбалската реши да стави знак стоп за организираното водење на навивачки групи на гостински терен.

„Комесарот за натпреварување на сениорските лиги, во согласност со одлуката на Здружението на прволигашите и актуелните закони на државава за спречување на насилството на спортските терени, стриктно ќе ги почитува сите донесени одлуки и закони, а во исто време најостро ќе ги санкционира сите наредни обиди за организирано водење на навивачи на гостински терен“, се наведува во известувањето на комесарот за натпреварување Горан Трпушевски.

Последните инциденти што ги направија навивачите на Работнички за време на дербито со Фени индустри во салата „Јасмин“ во Кавадарци ја прелија чашата на трпението. И викендов како и пред десетина дена во „Борис Трајковски“ на мечот меѓу Работнички и МЗТ Скопје дивеењето на навивачите ја стави кошарката во втор план. Она што требаше да биде празник за вистинските љубители на спортот од ингениозниот ум на хулиганите се претвори во пекол.

Како и во „Борис Трајковски“, така и во „Јасмин“ беше искршен дел од инвентарот. Во „Јасмин“ комплетно, со прозорците настрада и малата сала, а и неколку автомобили пред неа. Се пеплосува практично она што го плаќаме сите ние. Поради тоа, покрај забраните за патувања мора драстично да се зголемат казните за насилниците. Логично е товарот на глупоста да падне целосно врз нивниот грб. (Н.К.)