„Операција триумф“ за македонското евроинтегрирање
Боцевски ја презентираше скицата за исполнување на забелешките од ЕК, опозицијата се посомнева
Тамара Грнчароска
Акцискиот план на Владата за исполнување на препораките на Европската комисија содржани во извештајот за напредокот на земјава во изминатата година вчера од членовите на Националниот совет за евроинтеграции, генерално, ја доби поддршката, но само како документ, во чија пак реализација се посомневаа претставниците на опозициските партии.
Вицепремиерот задолжен за европски прашања, Ивица Боцевски, презентирајќи го планот, рече дека тој претставува политички и институционален одговор на Македонија на препораките на Европската комисија содржани во извештајот за напредокот на земјава во изминатата година и тој е скица и иницијатива на Владата со цел да се излезе во пресрет на процесот на евроинтегрирањето.
„Овој акциски план е со цел да се земе целосна сопственост на процесот, да се покаже дека Македонија, во сферата на европските интеграции, ја зема иницијативата и дека и понатаму останува цврсто посветена на целиот овој процес“, изјави Боцевски. Според него, стратегијата на Македонија во наредниот период е да не се даде никакво алиби за дополнително одлагање на наредната фаза на процесот на пристапување. „Планот, меѓу другото, има точни рокови кои нас самите не' врзуваат за реализација на планот“, рече Боцевски, според кого значаен дел од мерките треба да бидат реализирани до април 2009 година.
Претседателката на Советот, Радмила Шекеринска од СДСМ, говорејќи за планот, критички се осврна на имплементацијата, велејќи дека на Македонија никогаш не и' била проблем изработката на документи, туку нивната реализација. Таа упати забелешка зошто Советот и Собранието не биле консултирани пред да биде планот јавно презентиран, бидејќи „најголем дел од обврските се закони што треба да ги донесе Собранието“. Шекеринска за содржината на документот рече дека не ги третира областите посочени во извештајот на ЕК, како што се улогата на полицијата во изборните инциденти, собранискиот Деловник. Реформата на полицијата, проблемите со јавната администрација се прашања со кои земјата се соочува во континуитет и Владата вети дека ќе ги спроведува законите континуирано, но недостасуваат конкретни мерки за реализација, смета таа.
Македонскиот процес на евроинтегрирање Шекеринска вчера го спореди со реалното шоу „Операција триумф“, велејќи дека „три години бевме фаворит речиси во секоја емисија, не бевме спасувани, туку наградувани од публиката“. „Во последните три години публиката не' заборави, жирито не' искритикува, а директорот не сакаше да не' спаси“, рече Шекеринска, додавајќи дека очигледно настапот мора да се менува, и суштински и партиски.
Андреј Жерновски од ЛДП и Тито Петковски од НСДП беа на иста позиција во поглед на скицата, велејќи дека изготвувањето на документот е позитивна работа, но проблемот е во имплементацијата. За професорот Владо Камбовски, секој напор треба да се поддржи и да не се критикува однапред, особено не политикантски. „Политичарите знаат што треба да се направи, но не знаат како да се направи тоа“, рече Камбовски.
|
