Претходен број

Десницата ја спасува левицата од криза

Социјалдемократијата била на патерици, велат десничарски интелектуалци

„Македонската левица е во криза, што е дел од глобалните случувања. СДСМ по деведесеттите години стана олицетворение на политиката на олигархијата, политика која ги штитеше интересите на политичките елити наследени од комунизмот, но не само на нив туку и на бизнис, универзитетската и културната елита. Седумнаесет години не видовме алтернативи за нивното дејствување, период во кој се истроши левичарскиот концепт, а беа маргинализирани огромни слоеви население, како и оние во руралните подрачја“.

Ова е оцената на вицепремиерот Ивица Боцевски, кој вчера говореше на трибината „Криза во левицата“ што ја организираше Институтот „Павел Шатев“ на ВМРО-ДПМНЕ. Боцевски го илустрираше своето излагање со однесувањето на поранешниот лидер на СДСМ, Бранко Црвенковски, кој, според него, од „радикален македонски националист и албанофоб се претворил во гулаб на мирот, а сега и поборник за работничките права“. Тој нагласи дека „не може да се бара идеологија од партија која нема напишано идеолошки манифест од основањето досега“.

Покрај Боцевски, на трибината присуствуваа и други претставници од власта, но отсуствуваа претставници од опозицијата, иако организаторите рекоа дека тие биле уредно поканети. Причината за организирање на трибината, според организаторите, била „дефицитот во македонскиот дебатен простор“, како и тоа дека постои потреба од „реален судир на концепти кои ќе не' поведат чекор напред“.

Пратеникот на ВМРО-ДПМНЕ, Влатко Ѓорчев, смета дека кризата на левицата не се должи само на немањето лидер или недостигот од платформа, туку во тоа што недостигаат нови лица. „Македонската левица беше најсервилна кон федералниот центар по шееесеттите години“ рече Ѓорчев, кој прогнозира дека оваа криза ќе потрае можеби уште една генерација. Тој смета дека социјалдемократијата во Македонија била промотор на олигархијата и тајкуните преку криминалната приватизација.

„Социјалдемократијата во европските земји е во најтешка криза во последните 50 години“,став е на професорот Бранислав Саркањац. Изнесувајќи ги гледиштата на различни автори, тој посочи дека не и' се пишува убаво на социјалдемократијата во светот.

Професорот Ѓорѓи Иванов вели дека на глобално ниво, на избори победуваат партии кои се лоцираат во авторитарната десница.

За професорот Јован Донев од „Евробалкан“, левицата си ја одиграла својата улога, а десницата била доволно мудра да го искористи моментот.

„Шансата на левицата е прокоцкана. Најголемата опозициска партија е во внатрешна сериозна криза и е клинички мртва“, е став на професорот Донев. Тој не ги оправдува повиците на некои колумнисти за вклучување на граѓанскиот сектор во политиката, бидејќи тој не може да ја замени опозицијата. „Сериозно треба да се зборува за нова лева партија или хируршки да се обработи старата“, препорача Донев. (Ж.Х.З.)