Париз - „Светската економија ќе заздравува многу побрзо отколку што досега се предвидуваше, макар што тоа веројатно ќе биде бавно уште некое време“, соопшти Организацијата за меѓународна соработка и развој ОЕЦД. Во соопштението се вели дека оваа година рецесијата во Јапонија и во еврозоната ќе биде помалку остра отколку што оваа организација предвидуваше во јуни, додека шансите на САД се непроменети. На прес- конференција, еден од водечките економисти во ОЕЦД, Јорген Елмесков, изјави дека „фактори за брзо економско заздравување на 30 земји-членки се подобрување на финансиските услови, пораст на трговијата и завршување на неповолниот тренд во индустријата“. Тој, меѓутоа, предупреди дека заздравувањето ќе биде „колебливо, со падови и пораст“.ОЕЦД сега очекува дека индустриски најразвиените држави во оваа година ќе имаат економски пад од 3,7 отсто, а не од 4,1 отсто, како што беше прогнозата во јуни. Европа ќе има пад од 3,9 отсто, а не од 4,8 проценти, додека во Јапонија ќе биде 5,6 отсто, а не 6,8 проценти, колку што беше предвидено во јуни.

Новата прогноза на ОЕЦД предвидува и пораст на невработеноста. „Невработеноста може да ги намали потрошувачкиот морал и потрошувачката, што може да го загрози економското заздравување“, велат од ОЕЦД. (МИА)