Горки маки за лекување

За сини картони треба да си бездомник, реагираат повеќето невработени

Јасмина Јовановска



„Треба да сме бездомници и да живееме на улица за да се лекуваме на товар на државата“. Вака реагираат најголемиот број невработени откако „Утрински весник“ обелодени дека Министерството за здравство ќе ги заостри условите за добивање бесплатни сини картони. Министерството предлага невработените да влезат во категоријата граѓани што не се здравствено осигурани по ниедна основа. Ова се прави за да се редуцира бројот на фиктивно пријавените само за да добијат картони. За да добијат право на лекување тие ќе мора да докажат оти немаат никаков имот на свое име. Ако се разболат ќе мора приватно да се лекуваат. Невработените реагираат дека немаат пари за егзистенција, а не, пак, да плаќаат лекување.

„Ја прашувам државата како ќе го лекувам моето дете кога ќе настине. Мојата сопруга и јас не сме вработени. Ја изгубив работата пред една година. Немаме никакви приходи. Работам како амал и секој ден трчам да земам некоја дневница со која ќе обезбедам јадење. Живеам во трошна куќа што ја наследив од мајка ми. Што треба да направам, да ја продадам куќата за да ми даде државата?“, прашува 44-годишниот М.Ј. кој живее во населбата Драчево.

Тој се чуди што ќе прави ако девојчето му се разболи. „Еден сируп на приватно чини најмалку 300 денари. Зар ќе треба да просам и кратам од лебот за да му купам лекови на детето“, ги кажува маките загрижениот татко, кој е подготвен да работи што било, но газдата да го пријави.

Ова е само еден од многуте случаи на невработени што ќе се судрат со проблемот да не добијат бесплатни картони зашто државата ќе им бара документ за имотната состојба. Ова е еден од условите што го дефинира државата откако реши на сите неосигурени лица да им даде право на здравствено осигурување.

На лицата што не се здравствено осигурани им се бараат куп документи, кои ретко од нив може да ги обезбеди. Се бара државјанство, лична карта, извод од Матична книга на родените не постар од шест месеци, потврда од Управа за јавни приходи дека немаат приходи и потврда од Катастар дека не поседуваат имот или земјиште.

Практиката покажа дека голем дел од 100.000 неосигуреани имаа проблем токму со докажување на имотната состојба. Повеќето останаа без бесплатни картони. Тие коментираат дека ова право е повеќе декларативно и оти не може да се искористи.

Од Министерството за здравство само потврдија дека се заоструваат условите за сини картони за невработените. „Често се случува, многумина да работат на црно и да остваруваат приходи, а во Агенцијата за вработување да се пријавуваат дека се невработени и оти активно бараат работа. Сето ова го прават со цел да остварат бесплатна здравствена заштита“. Ова е објаснувањето на Министерството зошто и невработените ќе мора да докажуваат дека немаат имот за да добијат картони. Невработените, тврдат од Министерството, и натаму ќе можат да земаат сини картони, но, на ист начин како луѓето што немаат никаква основа на осигурување. Сево ова е иницирано со заклучок на Владата и не е иницијатива на Министерството за здравство.