„Скендер-бег“ - единствен адут на ДУИ

Дали плоштадот во Чаир ќе биде доволен за ДУИ да ги покрие сите неуспеси во власта

Светлана Унковска



Плоштадот „Скендер-бег“ и рамковните вработувања, се чини, се единствените адути што ги има ДУИ моментално во ракавот. Откако се виде дека ДУИ тешко може да издејствува напредок за своите стратегиски определби - зачленувањето на земјава во ЕУ и во НАТО, на интегративците не им преостана ништо друго освен да почнат да се однесуваат како своите коалициски партнери - да градат плоштади и да вработуваат свои кадри во администрацијата.

На отворената владина седница што се одржа викендов вицепремиерот Абдулаким Адеми повторно изброи колку луѓе досега вработиле и уште колку ќе вработат. За плоштадот „Скендер-бег“, пак, изненади тоа што за него не се „истакна“ ниту еден од министрите на ДУИ, туку на таа тема говореше вицепремиерот и министер за финансии, Зоран Ставревски, кој потврди дека во буџетот за наредната година се предвидени пари за негова изградба. Иако пред само еден месец министрите на ВМРО-ДПМНЕ тврдеа дека ништо не знаат за овој проект на Општина Чаир, сега се покажа дека Владата не само што го одобрила туку и дека за него ќе оддели околу половина милион евра од буџетот за в година. Но, тие средства не се и конечни, бидејќи проектот се' уште е отворен и граѓаните можат да поднесуваат предлози.

Но, дали овој, како што го нарече вчера премиерот Никола Груевски, „мал сегмент на големите инвестиции“ ќе биде доволно ефективен да се сврти вниманието на јавноста од неуспешното партнерство на ДУИ во власта, но и од кодошките досиеја. Ќе биде ли плоштадот „Скендер-бег“ доволен за да се покријат очекуваните негативни оцени во извештајот на Европската комисија за напредокот на земјава? На интегративците, се чини, се' повеќе ќе им требаат проекти од типот „Скендер-бег“, особено по се' посилниот притисок од опозициските партии на Албанците. По договорот што го постигнаа ВМРО-ДПМНЕ и ДУИ за Законот за попис, Нова демократија најавува протести во ноември. ДПА, пак, иако го бојкотира Собранието, се' повеќе му дише во врат на својот политички противник, особено со процесот на лустрација.

Многумина македонски и албански интелектуалци сметаат дека плоштадот „Скендер-бег“, дефинитивно, ќе го подели Скопје по етничка линија. Тие оценуваат дека плоштадот треба да биде компензација не само на „Скопје 2014“ туку и за позицијата што ја има ДУИ во власта поради неисполнувањето на амбициозните најави при нивното влегување во коалицијата.