Владата ќе избира нов државен правобранител

Владата ја почна процедурата за избор на нов државен јавен правобранител, кој треба да раководи со институцијата што е задолжена да ги штити имотот и интересите на државата.

Деновиве е објавен и оглас во „Службен весник“, како и во неколку дневни весници, во кој од кандидатите се бара да бидат дипломирани правници со најмалку осум години работен стаж по положениот правосуден испит и да уживаат углед во вршењето на функцијата. Иако мандатот на досегашната правобранителка завршува на крајот на октомври, во согласност со предвидената процедура, изборот е почнат во законскиот рок од 60 дена пред неговиот истек.

Дали актуелната државна правобранителка Оливера Китановска ќе добие уште еден мандат и ќе биде реизбрана, зависи исклучиво од Владата. Доколку повторно добие поддршка, нејзиниот мандат ќе биде зголемен од четири години на шест, бидејќи со последната законска рамка е направена измена во таа насока.

Китановска, која најголем дел од својата професионална кариера го минала во Правобранителството, планира повторно да си ја испроба среќата за добивање уште еден мандат.

„Знам дека е неблагодарно да се зборува за себе, но мислам дека заслужувам уште еден мандат. Во мојот мандат не се случи никаква афера, се врати угледот на институцијата што беше разнишан со ’Бачило‘, а мислам дека успешно ги штитевме и интересите на државата“, уверена е Китановска. Таа вели дека е задоволна што изградиле добра тимска работа, во која се вклучени стотина вработени во 15 подрачни единици. (Г.Д.)