Ѓоковиќ пречекан како крал во Белград
Стотина илјади фанови еуфорично го поздравија првиот српски тенисер со круната од Вимблдон во центарот на главниот град
Околу 100.000 српски тениски фанови му приредија кралски пречек на Новак Ѓоковиќ во центарот на Белград прексиноќа, откако 24-годишникот пристигна дома за да го прослави освојувањето на својата прва титула на Вимблдон. Ѓоковиќ, кој се искачи и на врвот на АТП-листата, беше еуфорично поздравуван додека со панормаскиот автобус се пробиваше со часови од аеродромот до плоштадот пред Српскиот парламент. Сообраќајот на главниот автопат беше запрен, а фановите излегуваа од своите автомобили за да го поздрават најпопуларниот спортист во Србија, чиешто целокупно семејство продефилира покрај него на огромната бина, на која рок-групи ја забавуваа масата.
„Ова е апсолутно неверојатно и на сите вас ви должам благодарност од срце за овој пречек“, рече воодушевениот Ѓоковиќ додека го држеше трофејот што го освои во големата битка во четири сета со Шпанецот Рафаел Надал во неделното финале.
„Дојде времето за да ги споделам сите мои чувства со вас и се' што можам да кажам е дека вие сте најдобри на светот, бидејќи само српските фанови можат да приредат ваква забава. Вие ми го приредивте најсреќниот ден во мојот живот, и повеќе од тоа и вам ви го посветувам овој трофеј“, додаде Ѓоковиќ, кој ќе го предводи бранителот на титулата Србија во четврт-финалето на Дејвис купот против Шведска на гости претстојниот викенд. „Ние имаме душа што не може да се спореди со никоја. Што се однесува до претстојниот настап на репрезентацијата, можам да ви ветам дека ќе сториме се' што е во наша моќ за да победиме повторно“.
Ѓоковиќ и неговите двајца помлади браќа потоа им се придружија на рок, поп и фолк бендовите на сцената, пеејќи заедно со нив додека фановите фрлаа конфети и вееја српски знамиња. Некои од нив држеа транспаренти со потсмешливи пораки за Надал, кој му го препушти првото место на АТП-листата на својот лут ривал.
„Рафа, го гледаш ли ова од Мадрид? Продолжи да го вежбаш тој твој бекхенд“, пишуваше на еден од нив.
Атмосферата го достигна врвот кога Ѓоковиќ и неговото семејство се фатија на традиционалното српско оро, а пиротехниката го распара небото над Белград во жешката вечер.
„Млади луѓе се собраа во огромен број тука за да го видат овој исклучителен млад човек и за да се инспирираат од неговите постигнувања“, изјави поранешниот Дејвис куп тренер Радмило Арменулиќ. „Тој е модел за угледување и вистински шампион, кој ги црпи силата и волјата од своите семејство и пријатели, што е најдобриот начин за да го задржите вашиот живот на вистинскиот колосек. Во врска со неговата игра, не сум во положба да му давам каков и да е совет, бидејќи тој е толку надмоќен на теренот“.
Поранешниот ракометен репрезентативец Игор Бутулија додаде: „Како некогашен врвен спортист знам колку е потешко да се досегне врвот како поединец. Токму поради тоа, триумфот на Ѓоковиќ ќе остане како најзначајно остварување во српската спортска историја“. |
