Вилнев: Формула 1 е здодевна
Поранешниот светски шампион Жак Вилнев откри дека повеќе не може да издржи да гледа Формула 1. Канаѓанецот има извозено 165 трки меѓу 1996 и 2006 година, во кои стигна до 11 гран-при победи и до една титула. Меѓутоа, неговиот афинитет кон овој спорт полека избледува, а 40-годишникот му се придружи на хорот што изразува незадоволство од доминацијата на актуелниот светски првак Себастијан Фетел.
„Не г��едам трки повеќе. Доста ми е. Не можам да се возбудам. На половина трка се проѕевам и ми станува тешко. Едноставно, се вознемирувам кога ги гледам сите оние момчиња што не можат дури ни да се одбранат, на пример Михаел Шумахер. Тој требаше да биде на подиумот во Монтреал“, вели Вилнев.
Тој воопшто не е импресиониран од новиот систем на подвижни крилца ДРС.
„Навистина не ме привлекува да гледам престигнување со ДРС“, додава тој. „Претпочитам да го гледам Луис Хамилтон како се бори, иако понекогаш тоа завршува со солзи, но барем е забавно. Сите други претекнувања со ДРС? Едноставно, заспивам. Бесполезно, здодевно, тоа дури не е ни тркање. Не разбирам зошто тоа нешто се наоѓа на Ф1-болидот во моментов. Луѓето сега си мислат: ’Ох, тој ќе ме престигне. Што му требаше?‘. И тоа е тоа. Нема возбуда. Ништо“.
Некогашниот возач на Вилијамс го поддржува агресивниот стил на Хамилтон, кој често беше казнуван од стјуардите на трките сезонава.
„Луис вози многу агресивно и заборава малку да ја користи и главата, па завршува со судир во луѓето. Но, тоа не треба да биде запрено. Тоа е тркањето. Тоа е тоа што сакате да го видите: битки“, нагласува тој. |
