Леброн Џејмс подобар од Коби Брајант

Откако за Божиќ славеа во „Стејпл центар“, кошаркарите на Кливленд ги совладаа Лејкерси и на свој паркет со 93:87. Во двобојот, на можеби најдобрите кошаркари на денешнината, Леборн Џејмс (37 поени, шут 13/25 и девет асистенции) беше поуспешен од Коби Брајант (31 поен, шут 12/31) во многу важната победа на Кливленд.

Имено, „метлата“ против Лејкерси во основниот дел од првенството во НБА-лигата значи дека ако и двата тима изборат големо финале, кошаркарите на Кливленд ќе ја имаат предноста на домашен терен во борбата за шампионскиот прстен. Коби Брајант го искористи натпреварот да ја помине границата од 25.000 поени (15. во историјата на НБА), но во моментите кога тој се кршеше, а двата тима бараа ѕвезда која ќе ги одведе до победа, не можеше да му парира на Џејмс.

Лидерот на Кливленд постигна 12 поени во низа при резултат 80:80 и го доведе својот тим до 33. победа во 44 натпревари. Мо Вилијамс кој со 28 поени го реши прашањето на победникот во првиот меч, го пропушти овој, а поради исчашено рамо барем еден месец ќе биде надвор од теренот.

Во вториот меч Денвер лесно се пресмета со Клиперси. Во победата од 105:85 Кармело Антони постигна 28 коша и фати десет топки, а Чонси Билапс постигна 13 од своите 20 коша во третата четвртина кога се решаваше натпреварот.

Резултати: Кливленд - Л.А. Лејкерс 93:87, Денвер - Клиперс 105:85.