Хет-трик на Гебрселасие во Дубаи

Хајле Гебрселасие ја забележа својата трета победа во низа на маратонот во Дубаи, но надежта на Етиопјанецот дека ќе постави нов светски рекорд пропадна поради проблеми со грбот. Светскиот шампион ја пречекори целната линија по 2:06,09 ч., 14 секунди пред Кениецот Чала Бејене, но повеќе од две минути побавно од сопствениот рекорд (2:03,59 часа).

„Сакав да го урнам рекордот, но што да правам?“, изјави 36-годишниот атлетичар.

„Важно е да го соборам мојот рекорд. Еден ден тоа и ќе се случи“, додаде Гебрселасие, кој за победата доби 250.000 долари, иако неговата цел беше понудениот милион за оној што ќе го собори светскиот рекорд.

Инаку, трката со награден фонд од два милиона долари привлече околу 12.000 натпреварувачи. Во женска конкуренција победи Мамиту Даска Молиса од Етиопија со време 2:24,18 ч., шест секунди подобро од тоа на сонародничката Аберу Кебеде Шевае.