Кавадарчани жедни, бавчите под вода

Дневните и ноќните рестрикции на водата за пиење и натаму се во сила во Кавадарци. Од локалната самоуправа велат дека граѓаните ја користат водата од водоводниот систем „Лукар“ за наводнување на дворовите и на бавчите наместо за пиење. Првиот човек на Кавадарци, Александар Панов, уште еднаш го потврди своето ветување за трајно решавање на проблемот со водоснабдувањето. Апелира до сите граѓани рационално да ја користат водата за пиење, особено во овој меѓупериод додека да почнеле инвестициските вложувања.

„Како градоначалник наследив општина со големи проблеми во водоснабдувањето поради што има редовни рестрикции. Затоа ветив решавање на проблемот. Не сум од оние политичари што ветуваат, а не исполнуваат. Јас се' уште стојам на тоа дека во мојот мандат, а тоа ќе биде најверојатно следната година, проблемот со водоснабдувањето ќе го решам, а ако не го решам, нема да се кандидирам за следен мандат“, дециден е Панов.

Тој вели дека во овој период кога има големи горештини енормно е зголемена потрошувачката на вода, пред се', поради нерационално користење на санитарната вода. Според него, за санитарни потреби не е мора да се троши толку многу вода, односно, потребно е многу помалку за разлика од потрошувачката што се регистрира овие денови.

„Токму поради тоа, за да го подобриме водоснабдувањето, особено додека да почнеме со инвестициските вложувања, апелирам до граѓаните рационално да ја користат водата, која е основе�� ресурс што ќе биде еден од основните причини за недоразбирања, бидејќи пивката вода секоја година се намалува. Апелирам да имаат обѕир спрема своите деца. Не се побитни бавчите со домати, кои можат да се купат евтино на пазарот, туку поважно е редовното водносабдување и задоволување на основните санитарни потреби на граѓаните“, вели Панов. (A.Д.)