Од срце и притисок се' повеќе страдаат и деца

Како и возрасните, така и децата и младите се' почесто се разболуваат од болести на срцето и крвен притисок. Болестите на циркулаторниот систем кај децата и младите на возраст од пет до 24 години бележат пораст од 14 отсто. Но, и натаму ова возрасна популација најчесто страда од бронхитис и пневмонии на дишните патишта. Ова го покажуваат податоците на Институтот за јавно здравје за 2009 година кога биле регистрирани вкупно 646.245 заболени, што е за околу шест отсто повеќе болни деца во споредба со 2008 година. Од нив, 170 деца починале, а од нив 130 биле на возраст од 15 до 24 години. Повеќе умираат машките деца или 125 од починатите се од машки пол.

Иако бројот на болни деца расте, во земјава недостигаат детски лекари. Според анализата на Институтот, еден лекар се грижи за 4.037 деца на возраст од 7 до 19 години, што е надвор од стандардот за здравствена заштита на оваа популација, а кој не се открива колкав е. Во сегментот за грижа за децата работат 90 лекари и 149 здравствени работници со виша и со средна стручна подготовка. Според Институтот, не задоволува и соодносот на лекарите и на здравствените работници со виша и средна стручна подготовка кој изнесува 1:1,7.

И натаму на првото место на листата на болести од кои најчесто страдаат децата и младите се респираторните заболувања. Од нив се разболуваат речиси половина од вкупно болните децата. На второ место се болестите на кожата, а на третото се болести на дигестивниот систем.

В�� пораст се и болестите на нервниот систем за 14,2 отсто, потоа на респираторниот систем за 12 отсто, на душевните растројства за 11,3 отсто, болестите на генитоуринарниот систем за 8,4 отсто, повредите и труењата за 5,5 отсто.

Тоа што циркулаторните болести земаат се' повеќе замав и кај детската

популација, лекарите го објаснуваат со зголемување на тежината како последица на јадењето брза храна и се' повеќе седење пред телевизор и компјутер. Затоа, подигнувањето на свеста на младите за здравите навики и здравиот живот треба да биде главниот лек во борбата против овие заболувања. Стручњаците препорачуваат подигнување на свеста преку програми за здравствена едукација со укажување на значењето за сопственото здравје и со намалување на ризичното живеење. (Ј.Ј.)