Гостивар се задуши во сообраќаен хаос

Киро Кипроски

Гостивар - Гостиварските улици се претесни да ги примат сите возила што ги има во зголемен број во овие летни денови поради печалбарите што решиле да го минат својот одмор во родниот крај. Гостивар се задушува во сообраќаен хаос што го создаваат самите возачи, кои ги оставаат возилата каде што ќе им текне, и покрај забраната за паркирање, создавајќи на тој начин застој во сообраќајот. Нервозните возачи ги вклучуваат сирените, а отежнато е и движењето на тротоарите каде што пешаците едвај поминуваат, бидејќи просторот за нивно движење е заземен од паркирани возила.

Сообраќајниот хаос го зголеми и отворањето на најпрометната раскрсница во Гостивар, меѓу улицата „Илинденска“ и булеварот „Гоце Делчев“, кај „Сити центар“, бидејќи не се поставени семафори ниту, пак, има сообраќаец да го регулира сообраќајот. Раскрсницата беше затворена пред една година. Сега гостиварци се задоволни што не ќе мораат да кружат за да стасаат до центарот на градот, односно побрзо и поедноставно без да кружат, можат да го продолжат возењето кон Тетово. Најзадоволни се бизнисмените, бидејќи со затворањето на улицата, прометот во трговските, угостителските и занаетчиските локали беше преполовен.

Локалната власт пролетоска достави барање до СВР - Тетово на раскрсницата да се изгради кружен тек. Но, барањето беше одбиено со образложение дека кружниот тек ќе го „задуши сообраќајот“.

Инаку, идејата за затворање на главната гостиварска сообраќајна артерија, која со децении го поврзуваше Гостивар со Дебар и со Кичево од едната страна, и со Тетово и Скопје од другата, беше на локалната самоуправа. Затворањето беше извршено спротивно на ГУП и на ДУП. Од Секторот за урбанизам, комунални работи, сообраќај и заштита на животната средина на Општина Гостивар изјавија дека со новото сообраќајно решение ќе се подобрат условите за нормално одвивање на сообраќајот. Но, прогнозите не се остварија. Се покажа дека има застој во одвивањето на сообраќајот, а граѓаните остро реагираа, па доставија и петиција. Локалната власт попушти и го врати првобитното сообраќајно решение, кое опстојуваше со децении.

Наскоро, како што ни рекоа во Службата за информирање, на раскрсницата ќе бидат вратени семафорите. Но, дотогаш таа ќе биде тесно сообраќајно грло, бидејќи нема семафори, нема сообраќајни знаци, нема полицаец да го регулира сообраќајот. А, на возачите им останува да се договараат и сами да си даваат предност на минување.