Скапаа 150 тони бостан на нива

Кавадарци - Скапува бостанот на нивите во Тиквешкиот регион. Производителите на лубеници се жалат дека имале катастрофална година, а родот го продавале речиси за без пари, само да не остане на нивите.

Слободан Стојковиќ од демиркапиското село Корешница остави 150 тони бостан на нива да скапува, бидејќи немало пласман. „Го продававме родот од еден до 2,5 денари за килограм, барем да ги покриеме трошоците. Успеавме да продадеме само мали количини. Иако се трудевме да произведеме квалитетни лубеници, надевајќи се дека ќе заработиме некој денар за да преживееме како земјоделци, еве, родот остана да скапе на нивата. Имам 5.000 евра загуба“, се жали Стојковиќ.

Тој смета дека државата треба повеќе да ги информира земјоделските производители кога, колку и што да садат за да не се доведат во ситуација да го фрлаат родот. (А. Д.)