Насловна

Почна бербата на „шардоне“

Лозарите шокирани од ниската откупна цена од 11 денари килограм

Во самиот старт на гроздоберот, кој почна со берба на винското грозје од сортата „шардоне“, лозарите останаа шокирани од откупната цена. „Шардонето“ се откупува по само 11 денари за килограм. Лозарите се незадоволни зашто во минатото оваа сорта грозје важеше за висококвалитетна и за неа добиваа и по 18 денари за килограм.

Општинската комисија за лозарство што работи во рамките на кавадаречкиот Совет вчера одлучи активно да се вклучи во преговорите меѓу лозарите и визбите и да помогне во спроведување на Законот за вино. Претседателот на Комисијата, Борис Давидов, информира дека е договорена интензивна посета на вин��рските визби со цел да се соберат податоци колкави количини винско грозје се подготвени да откупат визбите, но и кој и колку должи за откупено грозје во минатите години.

Но, додека се преговара, на терен работите се поинакви. Некогашниот прв човек на Агротиквешија и актуелен претседател на Комисијата за лозарство вели дека продолжува агонијата што трае со години.

„Ова е радикален пад на цените. За мене е ова лоша увертира на она што допрва може да се случува во Тиквешко. Се плашам што ќе се случи со некои други сорти за кои своевремено велеа да се садат оти биле висококвалитетни, а сега, по се' изгледа, никој нема намера да ги откупи. Состојбата може да биде лоша како лани, но и полоша“, дециден е Давидов. (А.Д.)