Со полиција или без неа, дивите превозници ќе останат без возила

Министерството за транспорт и врски донесе дваесетина решенија за запленување автомобили и комбиња

Сања Наумовска



Дивите превозници сами да ги предадат возила со кои вршат транспорт, или во нивно име тоа ќе го направи полицијата. Ова е најновата мерка со која Министерството за транспорт и врски ќе се обиде да стави ред во овој незаконски бизнис. Заплената се изрекува како дополнителна мерка покрај глобата што може да достигне и до 500 евра, особено кај превозници што повеќепати биле фатени во недозволен транспорт на патници. Автомобилите или мини-комбињата ќе треба да мируваат од три месеци до една година, во зависност од одлуката на Министерството, при што пресудно влијание во времетраењето на задржувањето на одземеното возило нема да биде дали превозникот сам го предал возилото или е одземено од полицијата.

По неуспехот со изрекувањето на прекршочните казни и одземањето на сообраќајните дозволи, кои досега беа единствени решенија за спречување на дивите превозници, надлежните се одлучија за подрастични мерки. Министерот за транспорт и врски, Миле Јанакиески, неодамна информираше дека огромен број прекршочни постапки почнати од патната инспекција не добиваат судска разрешница или, пак, глобите што се изречени се многу ниски. Таквата состојба, сметаат во Министерството и во здружението на превозници „Исток“, само го поттикнува ширењето на нелегалниот бизнис.

Значи, процедурата оди вака. Ако некој вози на диво, а притоа патните инспектори во неколку наврати го запреле и констатирале дека превезува на диво, се прави записник и се почнува процедура против него. Кога одлуката ќе стане правосилна и решението за неа ќе стигне до превозникот, тој ќе има три дена сам да го предаде возилото. Доколку не го направи тоа, заплената на возилото ја прави полицијата.

Одземањето на возилата што инспекторите за патен сообраќај ги фатиле при див превоз на патници е предвидено во најновите измени на законот за превоз во патниот сообраќај, кои се во сила десетина дена.

Деновиве се подготвени дваесетина решенија што им се доставуваат на превозниците без лиценца. Тие ќе имаат рок од три дена, во кој ќе можат сами да ги предадат возилата со кои вршеле нелегален транспорт. Ако го пропуштат рокот, возилата ќе ги запленува полицијата. Најголем број казни патните инспектори им изрекле на транспортери во Скопје, Прилеп, Струмица, Кавадарци, Тетово, Битола и во Гостивар.

„Заплената на возила ќе се практикува само во случаи на нелегални транспортери што веќе се казнети неколку пати, а, сепак, продолжуваат да се занимаваат со иста дејност. Моментно има четири решенија со уредна достава на кои им тече рокот за плаќање на глобата и доброволно предавање на возилото. Сите решенија предвидуваат времено запленување од три месеци“, информираат од Министерството за транспорт. Одлуката дали еден нелиценциран превозник само ќе се казни или и ќе му се одземе возилото ја донесуваат инспекторите за патен сообраќај, откако ќе ја констатираат состојбата. Решението го потврдува Комисијата за прекршоци во Министерството што има обврска да го достави до транспортерот. Оваа мерка се применува прв пат, велат во Министерството, при што појаснуваат дека против неа прекршителите имаат можност да поднесат жалба во рок од осум дена до Управниот суд.