И други земји немаат добри тендери во енергетиката

Во најновиот извештај на Европската комисија за напредокот на Македонија, меѓу другото, стои дека Министерството за економија нема доволен капацитет за успешно организирање тендери за големи проекти во енергетиката. Според министерот Фатмир Бесими, ова не е случај само со Македонија.

„Ниту една земја во регионот нема администрација што може да спроведе такви тендери. Работата околу меѓународните тендери бара одредени специфики и експертиза и поради тоа ние се одлучивме да ја вклучиме Меѓународната финансиска корпорација ИФЦ во реализацијата на енергетските проекти“, истакна вчера Бесими по потпишувањето на меморандумот за олеснување на процедурата за визи при групни патувања на кинески туристи во Македонија.

Во врска со неофицијалните информации дека менаџментот на загубарот ОХИС и неговите вработени сакаат сами да ја земат фабриката и да ја доведат во позитива, Бесими одговори дека на загубарите им е неопходен инвеститор со пари и со знаење.

„На загубарите им се потребни инвестиции и пари, а на вработените работни места. Треба да се разграничи што значи инвеститор, што менаџмент, а што вработен. Доколку вработените имаат доволно пари, нема проблем да го добијат ОХИС“, нагласи Бесими.

Тој како позитивен го оцени објавениот дел од извештајот што се однесува на надлежностите на Министерството за економија.

„Се бележи прогрес во областа на енергетиката со донесувањето на трите стратегии, за развој на енергетиката, за обновливи извори на енергија и за енергетска ефикасност. Се поздравува и тоа што измените во Законот за енергетика се подготвени и се во собраниска процедура. Напредок е забележан и во останатите области од работењето на Министерството“, изјави тој. (Ек.Р.)