ВИП расте во секој поглед

ВИП, третиот мобилен оператор во Македонија, кој во земјава е присутен преку групацијата „Телеком Австрија“, објави позитивни резултати од работењето во првите девет месеци од 2010 и третото тримесечје од 2010 година, заклучно со 30 септември 2010 година. Во тој период, ВИП значително ја зголемил својата корисничка база во третото тримесечје од 2010 година и достигнал повеќе од 388.000 корисници. Силниот раст е резултат на постпејд сегментот, кој пораснал до 31,6 отсто во третото тримесечје од 2010 година, споредено со 27,4 отсто во истиот период минатата година. „Ова придонесе пазарниот удел на оператор ВИП до крајот на септември 2010 година да порасне за речиси 50 отсто, споредено со пазарниот удел во истиот период минатата година“, информираат од компанијата. Приходите на ВИП пораснале за две третини, до 10,2 милиони ЕУР во третото тримесечје од 2010 година, споредено со истиот период лани, како резултат на порастот на корисничката база.

„Овој успех е дотолку позначаен ако се земе предвид фактот што операторот ВИП прв пат успеа да постигне позитивна ЕБИТДА во третото тримесечје од 2010 година, која придонесе и кон вкупната ЕБИТДА на групацијата ’Телеком Австрија‘“, изјави Никола Љушев, главен извршен директор на ВИП. Оперативната загуба на операторот ВИП се намали за 53, 9 отсто до 2,2 милиони евра во третото тримесечје од 2010 година, споредено со оперативна загуба од 4,7 милиони евра во истиот период лани. (А.С.)