Позеленеа лавовите на „Гоце Делчев“

Општинарите од Центар допрва ќе прават увид на терен

По спомениците на Гоце Делчев и на Даме Груев, позеленеа и два од четирите лава на мостот „Гоце Делчев“. Тоа особено паѓа во очи кај лавот од страната на тврдината Кале, но и кај соседниот е забележлива промената на бојата. Општинарите од Центар не знаат дека и тие споменици почнале да ја менуваат оригиналната боја откако пред неколку месеци се измени бронзата на спомениците на Гоце и на Даме.

„Двата лава како да се излеани од зелена бронза, која и не постои, целосно се позеленети. Како ќе објасните дека неколку метри подолу од лавовите, на споменикот на Скендер-бег нема никаква промена и по толку години. Веќе почнувам да се сомневам дека квалитетот на бронзата од која се леат нашите споменици не е тој за којшто плаќаме. Сметам дека е потребна подлабока анализа на квалитетот на спомениците“, рече Благородна Крстевска-Мојсовска, советник од СДСМ на последната седница на Советот на Центар. Го запраша градоначалникот Владимир Тодоровиќ дали тој, воопшто, ја знае состојбата на лавовите и дали планира да преземе нешто. Градоначалникот реплицираше дека секој ден поминувал оттаму, но не забележал никаква промена кај спомениците. „Очигледно промената не е толку драстична. Сепак, ќе пратиме екипа на терен и доколку има потреба, соодветно ќе реагираме“, вети Тодоровиќ, кој истакна оти најверојатно станува збор за процес на оксидација на бронзата, што е вообичаено.

Инаку, ова не е прв случај некои од спомениците од „Скопје 2014“ да ја сменат оригиналната бронзена боја. Минатата година слични проблеми имаа и коњаниците на Даме и на Питу. Нивните релјефи ја сменија бојата, позеленеа, па интервенираа екипи од италијанската леарница каде што се лееја. Надлежните тогаш објаснија дека станува збор за вообичаена состојба, процес кој не може да се спречи, туку единствено може да се санира. (Дс.Т.)