Претходен број

СДСМ чека Црвенковски да ги отвори картите

Раководството на социјалдемократите ќе формира работна група која ќе бара состанок со Црвенковски

Адутите за разрешување на кризата во СДСМ сега, се чини, се во рацете на претседателот на државата и поранешен партиски лидер, Бранко Црвенковски. Тој неодамна се изјасни дека не планира повторно да ја трча претседателската трка и дека ќе стори се' за да ја консолидира левицата, за потоа да повлече неколку крупни потези што драматично ја раздвижија политичката сцена.

И додека владејачката гарнитура сега е преокупирана со аболицијата за струмичкиот градоначалник Зоран Заев и со ветото за дузината закони, опозиционерите се соочени со дилемата дали нивниот поранешен лидер планира да се врати на кормилото на СДСМ. Поради тоа, се чека Црвенковски да се врати од одмор, по што партиското раководство ќе побара состанок со него, во очекување тој да се изјасни на која позиција во партијата се гледа во иднина. Според партиски извори, ова било договорено на состанок на Централниот одбор, кој заклучил дека треба да се формира работна група што ќе разговара со Црвенковски, во обид да се одгатне во која насока тој ја гледа консолидацијата на партијата. Од тие консултации веројатно зависи и дали социјалдемократите во септември ќе излезат на конгрес на кој би се избрало ново раководство или, пак, ќе се бара некое преодно решение до завршувањето на претседателскиот мандат на Црвенковски.

Во меѓувреме, евидентно е дека во СДСМ се кристализираат две струи. Дел од партиското раководство смета дека е неопходно конгресот да се одржи што поскоро, во функција на консолидација на партијата пред локалните избори, кои би требало да им претходат на претседателските. Приврзаниците на оваа опција мислат дека идниот партиски лидер би требало да се бара меѓу помладите членови на партиското раководство. За Црвенковски, пак, се смета дека, сепак, би требало да размисли за уште една кандидатура за шеф на државата. Процените се дека актуелниот шеф на државата како политичар од опозициските редови со највисок рејтинг би можел да го поправи бодовното салдо на СДСМ од неодамнешните предвремени парламентарни избори, па дури и да триумфира пред кандидатот на власта, која се' уште не се изјаснила кој е нејзиниот фаворит.

Другата струја во СДСМ, пак, смета дека опцијата со нов кандидат за лидер би можела да биде ризична, бидејќи во тој случај би можело да се појават повеќе кандидатури, што, пак, ��и значело нов внатрепартиски расцеп. Од тој аспект се проценува дека најдобра опција би било да се убеди Црвенковски да се врати на чело на партијата, бидејќи се смета дека тој би можел да дејствува обединувачки на членството. Во таков случај не е исклучено СДСМ да го побара својот претседателски кандидат надвор од своите редови, меѓу угледни личности од јавниот живот без посилна партиска заднина. Локалните избори, пак, би се премостиле со в.д. претседател или повторно со колективно раководство.

Во меѓувреме, Радмила Шекеринска ја официјализирала својата оставка и пред членовите на Централниот одбор. Генералниот секретар Горан Минчев, пак, се изјаснил дека оставката што ја најави ќе ја поднесе пред конгресот, како орган што го избрал на функцијата. Поради тоа, можно е да нема конвенција на која ќе му се гласа доверба на партиското раководство согласно со изборните резултати, туку директно да се оди на конгрес за избор на ново раководство. Сепак, останува дилемата околу мандатот на членовите на Централниот и на Надзорниот одбор на СДСМ, кои, исто така, би требало да поминат низ тестот на доверба, иако се избрани со четири години мандат. (А.М.М.)