Претходен број

И Атина и Скопје сакаат разговори „само“ за името

Се очекува да се одржи уште една консултација на државниот врв пред заминувањето на Димитров во Њујорк

Димитар Чулев

Шефицата на грчката дипломатија, Дора Бакојани, стави јасно до знаење дека во Њујорк може да се преговара „само за името и на кој начин ќе се користи тоа“. По завчерашната средба со премиерот Костас Караманлис, во врска со поканата на Метју Нимиц за нова рунда преговори во Њујорк, Бакојани уште додаде дека „Грција ќе седне на преговарачката маса со истите ставови“.

Дека ќе се разговара само за името е став и на македонската страна. Од Министерството за надворешни работи вчера ни потврдија дека нема промена и дека Димитров во Њујорк на маса ќе ги изнесе истите позиции околу името за кои Атина има различно гледање. Може да се разговара за името, но не и за прашања што засегаат во националниот, културниот и јазичниот идентитет на Македонија, велат во МНР.

За отворањето на таканареченото егејско прашање, околу кое се јавија контроверзии дали тоа дополнително ќе ги отежне разговорите со Атина или ќе доведе до извесна противтежа на се' подрските барања на Грција кои почнаа да засегаат во внатрешни прашања на земјава и наметнуваа дури и уставни промени, министерот Антонио Милошоски во една од последните изјави рече дека отворањето на прашањето на бегалците и правата на етничкото малцинство во Грција „ќе ги мотивира Грците кога ќе се преговара за името да се задржат само на тоа“.

Во МНР вчера, исто така, потврдија дека се очекува да биде одржана уште една консултација пред заминувањето на амбасадорот Димитров во Њујорк. Доколку претседателот Бранко Црвенковски се врати од одмор пред заминувањето на Димитров, нема причина да се отстапи од редовната практика и да се одржат заеднички консултации меѓу шефот на државата, премиерот, министерот за надворешни и нашиот претставник во разговорите што се водат со посредство на ОН.

Од Кабинетот на шефот на државата вчера не можеа да потврдат дали Црвенковски во деновите пред 14 август ќе биде слободен да присуствува на средбата на државниот врв.

Преговарачите за разликата околу името, Никола Димитров и Адамантиос Василакис, на 14 и 15 август во Њујорк ќе отпатуваат на консултации со медијаторот Нимиц по негово барање, што ќе отвори простор за негова посета на Атина и на Скопје кон крајот на овој месец или во почетокот на септември. Нимиц во Њујорк најпрво би имал одвоени средби со Василакис и со Димитров, а потоа и заедничка на која се очекува да објави своја сугестија за предлог-решение за името и доколку тоа е прифатливо за двете страни, со него би се заменила привремената референца ФИРОМ.

Дипломати во Атина, како што јавуваат агенциите, оценуваат дека доколку македонскиот претставник во Њујорк го постави прашањето за признавање на македонското малцинство, „нема да се најдат допирни точки меѓу двете земји за решавање на спорот со името“. И портпаролот на грчкото МНР, Георгиос Кумуцакос, деновиве го означи септември за исклучително важен месец за грчко-македонскиот спор.

Атина стравува оти Скопје би можело да инсистира да се разговара за ова прашање и затоа сака предвреме да го предупреди медијаторот Метју Нимиц да не го проширува дневниот ред на преговорите, пишува „Етнос“. „Та неа“ се повикува на дипломатски извори, според кои „ситуацијата не е многу поволна“ и останувало да се види што ќе се случи на претстојните средби во Њујорк. „Елефтерос типос“, пак, наведува дека тактиката на грчкото МНР за спорот со името е „ниту стапка назад“, а „Катимерини“ оти грчката позиција за ова прашање има поддршка од Франција, актуелен претседавач на ЕУ, јавуваат агенциите.

Извори во Обединетите нации за А1 велат дека двете претстојни рунди треба да доведат до разговори на повисоко ниво, кои би се одржале на маргините на Генералното собрание на Светската организација, кое започнува на средината на септември. Во интервјуто за скопската телевизија Алфа, американската амбасадорка во Македонија, Џилијан Миловановиќ, оптимистички изјави дека Македонија има „златна шанса“ да го реши спорот со Грција.

„Има предлози што треба да ги разгледа Македонија со Нимиц, што ќе ги заштитат македонските интереси и се' уште ќе бидат точки по кои ќе може да се преговара со Грција, а ние се надеваме дека тоа ќе се оствари за да се реши проблемот. Мислам дека ова е златна шанса за Македонија“, изјави Миловановиќ.