Претходен број

Љубиша Георгиевски адут на ВМРО-ДПМНЕ во претседателската трка?!

Конкурсот за претседателската номинација во ВМРО-ДПМНЕ веќе е отворен

Соња Крамарска

Прилично незабележано во јавноста помина веста дека поранешниот собраниски спикер Љубиша Георгиевски од уметнички директор на Македонскиот народен театар експресно е вратен во политиката како советник за Југоисточна Европа во Министерството за надворешни работи. Георгиевски, кој до вонредните парламенарни избори на 1 јуни беше шеф на македонскиот парламент, привремено се откажа од политиката, според тврдење на негови колеги од театарот, но веднаш по зацврстувањето на власта на неговата партија ВМРО-ДПМНЕ, политичките врати повторно му се отворени.

Со оглед на тоа дека наближуваат претседателските избори, чиј рок за одржување е в година во март или во април, а Георгиевски еднаш веќе имаше искуство во трката за највисоката функција, најновиот потег за негово политичко оживување оправдано ги иницира шпекулациите дали ВМРО-ДПМНЕ полека почнува да ја тестира климата за претстојната трка за шеф на државата.

Во ВМРО-ДПМНЕ официјално не даваат информација која ќе ги потврди или ќе ги демантира таквите анализи. Велат дека во скоро време ќе пристапат кон сериозни подготовки за претседателските избори и дека допрва ќе одлучат со кој кандидат ќе настапат.

Освен Љубиша Георгиевски, во политичките кругови како потенцијални кандидати за претседател од ВМРО-ДПМНЕ се сметаат и сопругата на загинатиот претседател Борис Трајковски, Вилма Трајковска, поранешниот министер за внатрешни работи Љубе Бошкоски и вицепремиерот Зоран Ставрески, но се' досега од партијата не е забележан никаков сигнал дека некој од оваа листа има посебен третман што би укажал дека ќе ја добие номинацијата.

Во 1994 година, како претседателски кандидат, Љубиша Георгиевски ја обвини владата на тогашниот премиер Бранко Црвенковски дека воведува концепт „Македонија како мултинационална држава“, што според него беше вовед во војна. Тој се залагаше Македонија да биде држава на македонскиот народ, со граѓански права за сите преостанати етнички заедници. Албанците, Србите, Турците и преостанати ќе треба да се навикнат да се изјаснуваат како Македонци од албанско, српско, турско или од друго етничко потекло, а нивните права ќе бидат во рамките на меѓународните стандарди. „Нема да ви ги уриваме џамиите“, им порача тој на Албанците, „бидејќи сме верници“.

Со досега��ните политички ангажмани како шеф на македонскиот парламент и амбасадор на Македонија во Бугарија, основач на Балканскиот политички клуб, како и претседател на партиската комисија на ВМРО-ДПМНЕ за надворешни работи, Георгиевски несомнено има со што да се пофали во својата биографија, особено кога тоа ќе се надополни со неговата претседателска кандидатура во 1994 година против Киро Глигоров.

Во веста што неодамна беше пренесена од агенциите по повод неговото именување за советник во македонската дипломатија за Југоисточна Европа, а зад која стојат партиски и владини извори, беше наведено дека „Георгиевски има долгогодишно дипломатско и политичко искуство кое ќе претставува значаен придонесе кон реализација на надворешнополитичките цели на Македонија поврзани со зацврстувањето на врските со другите земји од регионот“.

Како и да е, се чини дека конкурсот за претседателски кандидат во ВМРО-ДПМНЕ веќе е отворен и интересно ќе биде да се види каква ќе биде понудата на партијата која засега „царува“ на македонската политичка сцена.