Претходен број

ИНТЕРВЈУ

Опозицијата не смее да спие и да чека

Стевче Јакимовски вели дека ЛДП не може да живее за три говори на Манасиевски во парламентот

Оливера Војновска

Господине Јакимовски, по изборите побаравте одговорност од партискиот лидер. Што му забележувате на Јован Манасиевски?

Сметам дека е неактивен, инертен во политиката, како и во партискиот живот, работата на општинските организации, градењето на инфраструктурата. Има општински организации кои тој лично ги распушти, а по една и пол година не оформи ниту една. Во услови на рејтинг од 0,1 отсто претседателот и раководството требаше да работат на сплотување на партијата. Иако бевме ривали со Манасиевски, очекував поинаков однос, создавање хармонија во партијата, кревање на рејтингот. Не може ЛДП да живее за три говори на Манасиевски во парламентот. ЛДП има многу повеќе да каже во сите области, особено во економијата, социјалата, човековите права, енергетскиот систем, реформите во судството, локалната самоуправа, и тоа стручно и компетентно. Имам забелешки и во однос на изборниот настап. Во ситуација на катастрофален рејтинг, логично е да се настапи во коалиција. Но, уште пред изборите предупредував дека многу долго преговараат, дека 20 дена е многу кус период за да се стаса големата предност на Груевски, дека најмалку е битно дали Андов ќе има еден или двајца пратеници. Не се согласував со кадровскиот состав на листите.



Затоа што Вие не бевте на листите?

Не затоа што јас не бев на листа. Туку поради тоа што имаме кандидати кои воопшто не се популарни во јавноста.



Зборувате за пратениците од ЛДП или воопшто за „Сонце - коалиција за Европа“?

Зборувам за нашите пратеници, не сакам да коментирам за пратениците од СДСМ. Во ЛДП има пратеници кои две години воопшто не станаа да зборуваат во парламентот, им замирисаа столчињата на кои седеа. Навистина е срамота и нема логика повторно да бидат пратеници. А Слободан Најдовски, кој беше извонреден пратеник, го немаше на листите. Имаме четири пратеници од минатиот состав, еден од нив уста не отвори две години.



На кого мислите?

Се знае точно на кого мислам, се препознава. Ако човек се плаши да говори или ако не знае, коректно е да се тргне настрана и да дојде тој што знае и не се плаши.



Вашиот предлог за одговорност на раководството не наиде на поддршка во партијата. Манасиевс��и доби доверба од Централниот одбор.

Па мора да добие поддршка од своите другари во ЦО. Состојбата во ЛДП е таква што Манасиевски во ЦО стави 90 свои луѓе, десет мои. А во Извршниот одбор опозиција на Манасиевски сум само јас. Така што во конкретниот случај математиката е јасна. Инаку, овој пат неговата поддршка од 90, се стопи на 49. Многу луѓе одбија да гласаат, некои го напуштија ЦО, бидејќи Манасиевски го бираше ЦО, а доверба на лидерот може да му гласа само Конгресот, на кој е избран. Побарав од него да си поднесе оставка и јасно му кажав дека немам намера да се кандидирам за лидер. Затоа ме зачудија изјавите на Андреј Жерновски во јавноста од типот „проектот на Јакимовски да седне на местото на Манасиевски доби само пет гласа“. Жерновски веројатно имал проблем со сетилото за слух. Гласно кажав, а не сум човек што го гази дадениот збор, дека немам таква амбиција.



Опозицијата доживеа тежок пораз од кој се' уште не може да се соземе?

Груевски сега несомнено е многу силен. Меѓутоа, не е најпаметен. Прави грешки. Што значи дека опозицијата има многу голем простор за дејствување. Не е доволно само да се критикува, туку треба да се даваат и конкретни предлози. Мислам дека прво во СДСМ треба да се разреши прашањето дали Шекеринска се повлекува од лидерската позиција или не. Сите фракции, струења и во СДСМ и во ЛДП треба да се сплотат, да работат на еден заеднички проект. Не за уривање на власта, туку заеднички проект за да се подигне имиџот на опозицијата. Ако има медиумска блокада, тогаш треба да ја избере теренската работа. Не може опозицијата да спие и да чека рејтингот да го крене на една прес-конференција.



Каков настап треба да има опозицијата во ситуација кога ВМРО-ДПМНЕ има апсолутно мнозинство, а владината коалиција контролира и двотретинско и Бадентерово мнозинство?

Кога некому ќе му дадете апсолутна власт, тоа е исто како да излезете на автопат без знаци и сообраќај, ќе возите 200 километри на час, а може и глава да скршите. Така и Груевски, вака залетан со толкаво мнозинство ќе прави огромни грешки. Груевски бара слободно да работи, нека повели, нека носи закони. Да видиме дали во ноември Европската комисија ќе рече: „Браво, ти супер изработи, еве ти датум за преговори“. Или ќе му удрат уште една шлаканица. Влегуваме во фаза што е слична на онаа од 90-тите години со Милошевиќ во Србија. Тогаш, голем дел од граѓанството чувствуваше среќа, Милошевиќ го носеа на срце, на секој автобус имаше негова слика. Меѓутоа, по десет години увидоа дека нивната држава е донесена во ќор-сокак. И таму имаше замолчување на опозицијата, и таму имаше авторитарен режим. Сега во Македонија имаме комплетно иста ситуација.



Како го коментирате постизборниот политички амбиент: апсењето и аболицијата на Зоран Заев, бојкотот на опозицијата?

Го поздравувам тоа што го направи Црвенковски. И не знам зошто Груевски се чуди, бидејќи истото го направи и Трајковски со Доста Димовска. Мислам дека претседателот требаше да излезе уште похрабро и да соопшти дека ќе даде аболиција секаде каде што се злоупотребува институтот притвор. Значи, сите предмети што се комплетно расчистени во судската истрага, каде што ги има сите докази за обвинетиот и каде што нема опасност лицето да го повтори кривичното дело или да ја напушти земјата. Претседателот требаше да се закани за да сфати власта дека не може да си игра и да ги злоупотребува инструментите што и' стојат на располагање.



Какви се Вашите прогнози, ќе се смири ли политичката напнатост по аболицијата и враќањето на опозицијата во парламентот?

Не, мислам дека нема да стивне. Познавајќи ја суетата на Груевски, мислам дека ќе продолжи со исто темпо. Тој и натаму ќе оди со истата бруталност, тоа стана негов имиџ.



Како гледате на коалицијата меѓу ВМРО-ДПМНЕ и ДУИ?

Уште една фарса на Груевски. ВМРО-ДПМНЕ не' тераше да потпишуваме декларација за политичка изолација на Али Ахмети. Тврдеа дека никогаш нема да направат влада со терористи. Голема лага, слична на онаа кога кокошката бегала од петелот. Воопшто немаше потреба Груевски две години да ја трауматизира државата, да има вакви турбуленции на политичката сцена. Тој ги направи изборите за да има покритие ДУИ да влезе во Владата. И многу е смешно да каже „ни случајно нема да прифатам некој од командантите и терористите да ми бидат министри, директори“. Значи, Владата може да му ја гласаат терористи и команданти, ама тие не можеле да бидат министри!



Какви ��е Вашите прогнози за тоа како и колку ќе функционира нивното сојузништво?

Коалицијата нема долго да функционира. Прво, ДУИ, за разлика од ДПА, има политичка платформа. Разбираат политика и Груевски не би можел така лесно да ги надмудрува. Второ, тој во коалицијата има 21 партија и наскоро ќе почнат внатрешни проблеми. Мојата прогноза е дека оваа коалиција нема да трае повеќе од една - една и пол година. Тоа што го кажа Груевски дека нема да се поставуваат прашањата за зголемување на правата на Албанците е многу смешно. Како ДУИ ќе го гради својот рејтинг? Во тој случај драстично ќе зајакнува ДПА, а ќе паѓа угледот на ДУИ. Сигурен сум дека ДУИ нема да го дозволи тоа. ДУИ сега молчи, но тоа е само затишје пред бурата што ќе го снајде Груевски.