Л.А. Лејкерс ја прекина серија на Бостон
„Езерџиите“ славеа со 92:83, а нивниот тренер Фил Џексон ја забележа јубилејната 1.000. победа во кариерата
Екипата на Лос Анџелес Лејкерс демонстрира одлична партија во дербито против Бостон и славеше со 92:83 за прекинување на фантастичната серија на селтикси од 19 победи во низа. Пау Гасол погоди трипати во низа во последните три минути, а извонредна ноќ имаше и Коби Брајант. Го „почести“ Бостон со 27 коша и беше прво име кај „езерџиите“ во дуелот во „Стејлпс центар“. Кај поразениот тим Кевин Гарнет имаше ефект од 22 коша и девет скока, а Пол Пирс учествуваше со 20 поени и 10 скока кај селтикси кои се' уште се лидери на Истокот со рекорден скор од 27 победи и три порази.
За тренерот на лејкерси, Фил Џексон ова е беше јубилејна 1000 победа во кариерата.
„Дојде во совршен момент, да се забележи 1000 победа на Божиќ е нешто фантастично“, рече по мечот Фил Џексон, кој стана шести тренер во историјата на НБА со 1000 победи.
Во 17 сезони на кормилата на Чикаго Булс и Л.А. Лејкерс има биланс од 1000 победи и 423 порази и девет шампионски прстени.
Одлична божиќна честитка на своите фанови им испратија и кошаркарите на Орландо кои на својот паркет го поразија составот на Њу Орлеанс со 88:68. Турчинот Туркоглу забележа 20 коша, шест скока и пет асистенции, дабл-дабл ефект оствари Двајт Хауард (12 поена, 15 скока). Најдобар кај хорнетси беше Дејвид Вест со 13 поени и седум скока, додека Крис Пол и Дивајн Браун додадоа по 12.
Драматична завршница имаше во мечот меѓу Феникс и Сан Антонио во кој спарси триумфираа со 91:90. Победникот беше решен со тројка, постигната со звукот на сирената, во изведба на Роџер Мејсон. Покрај него се истакнаа и Тони Паркер со 27 поени и Тим Данкан со 25 коша и 17 скока. Во тимот на Феникс целиот товар во играта падна врз центарската двојка Стадемаер - О'Нил. Првиот постигна 25 коша, вториот 23.
Кливленд и натаму е единствена непоразена екипа на домашен терен во оваа сезона во НБА лигата. Кавалирси сега имаат ефект од 15-0 на својот паркет, откако славеа и против Вашингтон со 93:89. За најновиот триумф на Кливленд придонесоа Мо Вилијамс со 24 коша и Леброн Џејмс, кој уфрли 18.
Резултати: Орландо - Њу Орлеанс 88:68, Феникс - Сан Антонио 90:91, Л.А. Лејкерс - Бостон 92:83, Кливленд - Вашингтон 93:89, Портланд - Далас 94:102. |
