Претходен број

Милион евра за камери во Клиничкиот центар

Поставени се 950 камери во установите и 150 надвор од објектите, а за проектот се потрошени околу еден милион евра

Јасмина Јовановска

Камерите кои без прекин ќе снимаат во болниците и клиниките вчера беа пуштени во функција без докрај да се заштити приватноста на пациентите. За 1.200 камери се потрошени околу еден милион евра.

Иако трипати досега од Агенцијата за заштита на лични податоци имало забелешка ликовите на лицата во чекалниците, пред шалтерите и ходниците да се замаглуваат, не било сторено тоа до вчера утрото, кога министерот за здравство, Бујар Османи, го промовира системот за видеонадзор.

И покрај тоа што забелешката од Агенцијата, како што дознаваме, не била внесена во правилникот за начинот на вршење на видеонадзорот во здравствените установи, министерот Османи тврдеше дека правилникот е усогласен со забелешките и со Законот за заштита на лични податоци и дека усогласувањето го направиле ден пред да се пушти системот, односно завчера попладне.

Од Агенцијата за заштита на лични податоци, пак, велат дека целата измината недела работеле на правилникот, но останале уште две забелешки, кои до Министерството за здравство биле дадени вчераутро. Агенцијата, сепак, била известена дека Министерството за здравство попладнето работи на усогласување на правилникот со забелешките и се надева дека овој пат забелешката за замаглување на ликовите ќе биде внесена во правилникот. Втората забелешка, како што ни рекоа во Агенцијата, се однесува на тоа кој ќе биде чувар на архивата и кој ќе има пристап до неа. „Некои делови за архивата беа прифатени, а останаа уште неколку“, објаснуваат во Агенцијата и додаваат дека тие даваат само мислење кое Министерството за здравство не е обврзано да го прифати.

Иако камерите ги пушти во функција без да биде целосен правилникот, министерот Османи смета дека е добро што за поставувањето на камерите се развила „дискусија во јавноста слично како и во Лондон и во Токио“.

Според него, видеонадзорот се воведува заради поголема ефикасност на здравствениот систем и за подобрување на безбедноста на јавните здравствени установи. „Камери има на главните влезови, пред шалтерите, чекалниците, болничките ходници, централните аптеки и центрите за зависност. Поставени се 950 камери во установите и 150 надвор од објектите“, го објасни Османи проектот за кој се потрошени околу еден милион евра. Во системот за видеонадзор се 71 локална единица поставени во 64 здравствени установи и една централна што се наоѓа во просториите на Заеднички служби при клиниките. „Во централата ќе има само п��т авторизирани лица кои ќе вршат мониторинг. Ако некој има потреба од видеозаписите, процедурата ќе оди преку Министерството со посебно барање“, објаснува Османи, кој исто така ќе може да врши мониторинг. Ова право Османи го објасни со фактот што тој ги именува директорите на здравствените установи.

За поставувањето на камерите повторно реагираше и клиничкиот синдикат, кој на министерот за здравство му порача дека подобро е да се мисли како да се вработи медицинскиот кадар, кој е дефицитарен, отколку да се трошат пари за видеонадзор. Синдикалците се за камери само на влезовите на објектите, се' друго е кршење на приватноста на пациентите и на лекарите.