Гадафи не си оди
Триполи - Никогаш нема да ги прифатам барањата да ја напуштам земјата на моите дедовци, изјави либискиот лидер Моамер Гадафи, коментирајќи го засилениот меѓунарoден притисок за негово заминување од власта.
„Бараат од мене да ја напуштам Либија. Тоа е смешно. Никогаш нема да ја напуштам земјата на моите дедовци ниту, пак, мојот народ кој се жртвува за мене“, изјави Гадафи во обраќањето пред неколку илјади свои приврзаници во градот Завија, 50 километри западно од Триполи, истакнувајќи дека е подготвен да го жртвува својот живот за народот.
Реакцијата на Гадафи следува по средбата на Контакт групата за Либија, што се одржа во четвртокот и во петокот во Истанбул, на која опозицискиот Преоден национален совет беше признат како легитимна власт на земјата, а од либискиот лидер беше побарано да се повлече од власта.
Во меѓувреме, пак, силите на НАТО во текот на ноќта во саботата и вчера претпладне ги продолжија воздушните напади врз Либија. Само во Триполи во текот на ноќта одекнале најмалку 13 експлозии.
Либиската државна телевизија Ал Џамахирија објави дека „колонијалните крстоносни агресори“, мислејќи на силите на НАТО, нападнале цивилни и воени објекти во населбите Аин Зара и Таџура во источниот дел на Триполи. Телевизијата тврди дека во нападите имало и жртви, но не наведе конкретни бројки. (МИА) |
