Велемајсторот Трајко Недев (рејтинг 2518) со 4,5 поени од седум партии се наоѓа на делба на 34 место во конкуренција на 332 шахисти на 9. Европско поединечно првенство во Пловдив. Најуспешниот меѓу седумтемина македонски претставници на шампионатот во седмото коло славеше со бели фигури над ВМ Виорел Јордаческу (2584) од Молдавија и на четири кола до крајот се доближи до групата од 23 шахисти што ќе изборат настап на Светскиот куп.
Педесетпроцентен ефект досега остварија велемајсторите Звонко Станојоски (2506), Владимир Георгиев (2572) и Влатко Богдановски (2391). Станојоски, кој во четвртото коло го однесе скалпот и на Бугаринот Александар Делчев (2639) по големата победа во второто над Украинецот Сергеј Федорчук (2671), во седмата рунда со црни фигури го совлада ИМ Роберт Рис (2395) од Холандија. Индиспонираниот Георгиев со бели само ремизира против ИМ Павел Димитров (2414) од Бугарија, а Богдановски со бели го победи ИМ Василиј Папин (2483) од Русија.
Три поени досега собра ИМ Александар Чоловиќ (2493), кој со црни го подели поенот со Гркот Јоанис Георгијадис (2394). По 2,5 поена имаат ИМ Ванчо Стаменков (2350), кој со црни загуби од ИМ Давит Магалашвили (2462) од Грузија, како и ФИДЕ-мајсторот Дејан Динев (2298), кој исто така со црни ремизира со Габриел Греческу (2423) од Романија. (Р.Д.)
