Жестока тепачка на играчите на Јунајтед со обезбедувањето на „Стемфорд бриџ“
На тепачката на играчите на Манчестер јунајтед и вработените на „Стемфорд Бриџ“ по дербито во Премиерлигата, наводно, претходеле тешки навреди на расна основа упатени кон играчите на Јунајтед, особено кон Патрис Евра. Засега ниту Јунајтед ниту Ф.А не ги потврдија ваквите шпекулации. „Гардијан“ пишува дека Евра ја загубил контролата, но додава дека бил испровоциран. „Евра беше сериозно навредуван од еден од вработените на „Стемфорд Бриџ“, тој побара објаснување, а потоа почнаа да го напаѓаат. Логично беше да го одбраниме, а само неколку секунди подоцна сите бевме опкружени со стјуарди. Верувам дека снимките ќе покажат кој го предизвикал инцидентот. Не ми се верува дека вакво нешто можеше да се случи“, изјави Карлос Тевез.
Инаку, играчите кои Јунајтед не ги користеше за мечот со Челзи го завршуваа вообичаениот мини тренинг по мечот, а обезбедувањето ги замоли да не трчаат по теренот, за да биде среден за утрешниот меч од ЛШ против Ливерпул.
Тие одбија да џогираат пред косилките и се претпоставува дека некој ги навредувал, по што дошло до тепачката. На сето тоа му претходел и инцидент во тунелот по завршување на мечот, каде, наводно, Харгрејвс и Фердинанд ги нападнале судиите. Изнервираниот Рио сакал да шутне една реклама, но погодил една работничка на стадионот.
На девојката и останале трагови од копачките на коленото, по што добила и извинување и цвеќе од Рио. Ф.А најави истрага за целиот случај и ригорозни казни.
