Лука Модриќ од Динамо во Тотенхем за рекордни 25 млн. евра
Носителот на играта на хрватската репрезентација и довчерашен член на Динамо потпиша петгодишен договор со Тотенхем од кој тој лично ќе заработи 15 милиони евра (три по сезона) додека „модрите“ на име на обештетување ќе добијат реркордни за Хрватска 25 милиони евра!
Лука Модриќ деновиве престојуваше во Тотенхем, се запозна со своите нови соиграчи и со тренерот Хуанде Рамос. „Лука е комплетен играч со огромен потенцијал. Тој е големо засилување за нас. Покрај исклучителниот талент го краси неверојатна преданост кон играта. Има и силен удар, а подеднакво добро игра и со лева и со десна нога. Без претерување Модриќ е играч каков што му недостасува на Тотенхем“, изјави шпанскиот стратег, кој е среќен што ја доби битката за Модриќ во која актери беа и Арсенал, Баерн, Њукасл, Ливерпул, па дури и Барселона.
Самиот Модриќ е одушевен од Лондон и Тотенхем. „Тука атмосферата е фантастична. Стадионот е одличен исто како и навивачите. Се надевам дека ќе го исполнам она што се очекува од мене“, изјави Модриќ, кој ќе го носи дресот со број 14, како и во хрватската репрезентација. |
