Умре Виктор Черномирдин

МОСКВА - Почина поранешниот руски премиер Виктор Черномирдин, кој го креираше гасниот монструм „Гаспром“, соопштија вчера од Кремљ. Тој имаше 72 години. Черномирдин беше именуван за премиер од претседателот Борис Елцин во 1992 година и ја извршуваше таа функција до 1998 година, а многу краток период беше вршител на должноста претседател додека Елцин отсуствуваше поради операција на срцето. Тој беше премиер со најдолг мандат во постсоветска Русија, но е најпознат по формирањето на „Гаспром“, најголема компанија за гас во светот.

По создавањето на „Гаспром“ Черномирдин, поранешен советски министер за гас, беше избран за претседател на бордот на овој гасен гигант. (Ројтерс)