Косово оди на предвремени избори

Приштина - Централната изборна комисија на Косово наскоро ќе донесе оперативен план за предвремените избори закажани за 12 декември, а со него ќе бидат прецизирани кратки рокови, вклучувајќи и временски период од десет дена колку што политичките партии ќе имаат на располагање за предизборната кампања. 

Ангажирањето на Комисијата следуваше по одлуката на вршителот на должноста претседател на Косово, Јакуп Красниќи, да распише избори на 12 декември и да го распушти парламентот откако вчера и' беше изгласана недоверба на владата на Хашим Тачи. 

Печатените медиуми во Приштина оценуваат дека Кабинетот е симнат од власт „во неприродни услови“ и тоа со гласови на Демократската партија на Косово што ја формираше Владата.

„Малку признавања, многу патувања, полно полемики, како и разидување на коалициските партнери се само дел од моментите што го опишуваат ова владеење“, оценува „Коха диторе“. 

Владата доби легитимитет на 9 јануари 2008 година со 85 гласа, додека на денот кога падна легитимитет и' одзедоа 66 пратеници, потсетува весникот. (МИА)