Џорџ Буш утна во Ирак

Во мемоарите, експретседателот вели дека е несреќен оти не најде нуклеарно оружје во Ирак

ВАШИНГТОН - Поранешниот американски претседател Џорџ Буш се' уште има „одвратни чувства“ поради неуспехот да го пронајде оружјето за масовно уништување во Ирак, објавија американските медиуми. Ова откритие се наоѓа во неговите мемоари „Одлучувачки поенти“ што треба да излезат следната недела. Тој, исто така, открива дека привремено размислувал за замена на потпретседателот Дик Чејни нарекувајќи го „Дарт Вејдер на администрацијата“. Меѓутоа, нема коментар за неговиот наследник во Белата куќа, Барак Обама.

Шеесет и четиригодишниот поранешен претседател ја брани својата одлука за инвазија врз Ирак во неговата автобриографија, до која предвреме успеа да дојде „Њујорк тајмс“. Тој наведува дека на Ирачаните им е подобро без поранешниот ирачки лидер Садам Хусеин, кој тој го нарекува „диктатор склон да убива“, додавајќи дека и на САД, исто така, им е подобро без Хусеин, кој настојуваше да произведе биолошко или хемиско оружје.

Меѓутоа, Буш признава дека бил шокиран кога не било пронајдено оружје за масовно уништување во Ирак. „Никој не беше пошокиран и побесен од мене кога не го пронајдовме оружјето“, пишува тој. „Имав одвратно чувство секојпат кога помислував на тоа. И се' уште имам“.

Буш во својата книга, исто така, се фокусира на анегдоти и детали за 14 големи настани во неговиот живот и претседателскиот мандат, вклучувајќи ја и одлуката да престане да пие и неговите одлуки што ги донесе по 11-септемвриските напади во 2001 година.

Тој признава дека направил грешки кога одговори на ураганот „Катрина“ во 2005 година и опишува оти се чувствувал „како капетан на брод кој тоне“ кога економската криза ескалираше кон крајот на својот мандат во 2008 година. Но, додава: „Финансиската криза не треба да биде изговор за зголемување на даноците“.

Мемоарите може да му помогнат на Буш, кој замина од функцијата со најнизок рејтинг на еден претседател на САД, подобро да го опише неговиот мандат. „Каков и да биде заклучокот за моето претседателствување, јас сум задоволен со фактот дека нема да бидам тука да го слушам тоа“, пишува Буш. (Би-Би-Си)