САД ќе дадат половина милијарда за амбасада во Кабул

КАБУЛ - Американскиот Стејт департмент одвои повеќе од половина милијарда долари за проширување на амбасадата во главниот град на Авганистан, Кабул, проект за кој наведува дека ќе отвори стотици работни места и ќе ја рефлектира нивната посветеност на Авганистан. Договорот во вредност од 511 милиони долари и' беше доделен на американската градежна компанија „Кадел констрашн инк“ од страна на американското Министерство за надворешни работи, одделот за прекуокеански градежни операции, за изградба на дополнителни канцеларии и проширување на постојаната резиденција, соопшти американската амбасада во Кабул.

Со договорот ќе се отворат дополнителни 1.500 работни места и ќе се инјектираат околу 200 милиона долари во авганистанската економија преку вработувања, набавка на материјали, транспорт и закуп на имот, соопштија од амбасадата. Вчерашното обелоденување привлече споредби со американското однесување во Ирак каде што беа откриени планови за огромна нова амбасада во Багдад во 2007 година, што се гледаше како чекор чија цел е да ја симболизира нивната транзиција од окупаторска сила во сојузник на суверената власт.

САД минатата година најавија цивилен бран што ќе го дополни приливот на сили во Авганистан, меѓутоа, бројот на воен персонал е значително помногуброен од претставниците на Стејт департментот. (Ројтерс)