Потрага по убијците на момчето во Арачиново

Полицијата го истражува убиството на петнаесетгодишното момче од Арачиново, кое беше застрелано завчера попладне во чајџилница во скопското село. Првичните информации укажуваат дека убиството е извршено со огнено оружје, но колку куршуми завршиле во телото на момчето и дали во него пукале еден или повеќемина напаѓачи, дополнително ќе се утврдува, велат од МВР.

Суровото убиство се случи завчера околу 16,30 часот во кафе-клуб на улица „Антон Попов“ во скопското село Арачиново. Петнаесетгодишниот Љуљзим Лимани работел како келнер во чајџилницата на неговиот роднина Џељал Ајети, кој и' е познат на полицијата. Пред неговата куќа во два наврата претходно беа поставени бомби.

„Убиството, најверојатно, е извршено со употреба на огнено оружје, а напаѓачот пред да го напушти објектот одзел компјутер преку кој бил поврзан видеонадзорот на кафе-клубот“, објаснуваат во МВР. Телото на момчето, кое лежело во локва крв го пронашол негов роднина. Ранетиот веднаш бил пренесен во Градската болница во Скопје, но веќе било предоцна.

На местото на настанот е извршен увид, а по наредба на истражен судија, телото на починатиот е предадено на обдукција. Се преземаат мерки за откривање на сторителот и за расчистување на случајот. (Х.Р.)