Судиите-поротници го ставија протестот во мирување

Најголемиот број од судиите-поротници кои вчера утро на неколку часа ја прекинаа работата, по разговорите со претседателите на двата скопски суда, протестот го ставија во мирување и се вратија во судниците. На средбите со првите луѓе на двата Основни суда било договорено поротниците да се вратат на своите работни места, а во меѓувреме, да продолжат преговорите со Министерството за правда, по барањата што тие минатиот петок ги доставија на увид на јавноста. Поротниците бараат дневниот надоместок наместо 125 денари, да не биде вратен на 200, туку да се зголеми на 500 денари, зголемување на старосната граница да изнесува 64 години старост, како и ретроактивна исплата на сите долгувања, започнувајќи од први јануари годинава. Претставници на судиите поротници во саботата одржале средба со надлежните од Министерството за правда, односно со државниот секретар, со судиите од Републичкиот судски совет и со претседателите на двата основни суда во Скопје. (Љ.С.)