Алина Кабаева

Љубовницата на Путин во „Вог“

Новата уредничка на руското издание на магазинот „Вог“, Викторија Давидова, ја ставила наводната љубовница на Владимир Путин, 27- годишната Алина Кабаева, на насловната страница на јануарскиот број. Меѓу нозете на фотографијата е ставен и адекватен наслов: „Нејзината главна победа“.

Младата Алина е руска ѕвезда во ритмичка гимнастика, која во Атина 2004 освои златен олимписки медал. Модните критичари веќе и' најдоа забелешка на насловната страница, зашто Алина е облечена во златен фустан „балман“, во кој неколкупати се појавуваше на насловните страници и модни магазини ширум светот во текот на 2010 година.

Врската меѓу младата Алина и премиерот на Русија никогаш не беше потврдена, најверојатно, затоа што Путин и натаму е во брак, но според неофицијалната верзија, познатата гимнастичарка минатата година му родила дете. Идентитетот на таткото не сакала да го открие. Медиумите што пишуваа за нивната врска, мистериозно пропаднаа.

Тие двајцата, наводно, не се веќе заедно, па Алина судејќи според се', токму затоа и се решила да се согласи и да се појави на насловната страна.

Со оглед дека ова е прв број на „Вог“ под диригентската палка на Викторија Давидова, останува да се види дали името на оваа госпоѓа ќе остане во импресумот на февруарскиот број.