Дивиот коноп - кошмар за семејството Илиевски

Ова растение на периферијата од Битола го има секаде, крај патот, до детска градинка и на парцели каде што се гради

Битола - „Од чесни земјоделци не' направија криминалци. Цел живот со мака го врвиме за чесно да се прехраниме. И на крај што дочекавме - по затвори да скапуваме“, скршена од болка, но во исто време и со чувство на гнев и револт, тажи над својата и семејната судбина 57-годишната Лиле Илиевска, мајка на млекарот Душко, откако нејзините два сина и сопругот од петокот се во притвор осомничени за одгледувања марихуана.

За МВР единствен доказ дека млекарот Дуле Илиевски одгледувал канабис сатива, растение од кое се прави опојна дрога марихуана, се 203 стебла што ги откорнаа од меѓата на неговата нива со компири. Полицијата по приведувањето не излезе со други докази.

Сепак, мајката Лиле и двете снаи во семејството Илиевски се надеваат дека до вторник судот ќе одлучи позитивно по жалбата на одбраната и ќе дозволи тројцата млекари да се бранат од слобода. Најсилниот адут и вистината за одбраната на Илиевски е што целото битолско поле каде што е лоцирана и нивната нива со компири со векови расте див коноп, а семето вирее и денес. Ова растение на периферијата од Битола го има секаде, крај патот на улицата „Железничка“, покрај детската градинка во населбата Карпош , дури и на парцели каде што во моментов се гради.

Трите жени од семејството Илиевски се оставени сами со четири мали деца, беспомошно велат дека се преплашени што ќе се случи со машките глави, но во исто време ги мачи и помислата како ќе преживеат. Нивите им се пустат исто како и летнината, која им скапува во амбарите. За нив е несфатливо како може нивните мажи да бидат осомничени за одгледување марихуана кога цело битолско поле, почнувајќи од соседните ниви, е преплавено со диворастечка марихуана.

„Сите луѓе што имаа ниви во битолско поле не' знаат, ние не сме биле ниту арамии, ниту крадци ниту, пак, тепачи. Нас не' украле, ама ние никогаш ништо туѓо не сме зеле. Цело поле во Битола е со марихуана. Ние ги наводнуваме компирите, а не тревките. Но, што стана сега децата, со денови плачат, не можат да заборават дека татко им со врзани раце го однесоа од дома. Како ним да им објаснам што се случува. Мојот Томе уште некој ден ако остане в затвор нема да преживее“, се жали мајката Лиле.

Запрепастена продолжува да раскажува во солзи додека ги собира компирите од нивата каде што полицијата пронајде 203 стебла канабис сатива. „Од кога сме родени за мака сме. Прво бевме свињари. Одгледувавме 550 свињи, со километри со коњот одев до војската за да ја земам помијата за да ги нахранам. Тоа пропадна, станавме фармери, купивме крави и се отиде во ’Сведмилк‘. Ни пропаднаа над 30 илјади евра. Кравите ги продадовме пошто-зошто, од 500 до 700 евра. Отавивме уште два крави, колку за млеко да имаат децата и се зафативме со земјоделство. Лебот во пот натопен го јадеме и пак не' направија криминалци. Ние сме одгледувале коноп“, раскажува домаќинката во семејст��ото Илиевски.

Макотрпниот, но мирен живот на ова битолско семејството се претвори во кошмар токму по случајот „Сведмилк“, кога млекарот од Битола, Душко Илиевски, тргна на протести и стана еден од водачите на пелагониските фармери, кои само си ги бараа тешко заработените пари од откупот на млекото. На протестите на фармерите стотици млекари од Пелагонија ја делеа истата мака со Душко, сега на раце се бројат фармерите што се обидоа во овие моменти да му дадат поддршка на неговото семејство.

„Со Душко не' поврзаа проблемите со ,Сведмилк‘. За мене тој е домаќин човек, чесен граѓанин на оваа држава. Сето ова што се случува, не знам што е работата. Мое мислење е дека Душко такво нешто нема направено. Кажуваат дека сите ниви и меѓи во Градско поле го имаат дивиот коноп“, вели Гоце Кантаровски, еден од поранешните фармери на „Сведмилк“, млекарот од Могила, кој во својата куќа го пречека лидерот на СДСМ, Бранко Црвенковски.

Случајот со апсењето на млекарот Илиевски, неговите брат Цане и татко му Томе, за лидерот на опозицијата Црвенковски е најдобар доказ за вандализмот и силеџиството на актуелната власт.

„Човекот чие семејство е едно од најпогодените во криминалната афера ’Сведмилк‘, за што директна одговорност сноси актуелната Влада, со право во јавноста повикуваше да се исправи таа неправда и да се обесштетат сите млекари што претрпеа огромни штети. И што се случи? Видовме дека му поднесоа пријава за марихуана. Што е следното, јас не знам. Дали ќе биде обвинет како терорист, припадник на Ал Каеда или нешто слично. Ова е голема неправда, срам, грев и сакам да им порачам на сите, почнувајќи од премиерот Груевски, па до овие битолски моќници, дека ова вака нема да оди. Работите брзо ќе се свртат, многу побрзо отколку што во најлошите мисли очекуваат и посакуваат“, рече Црвенковски во Битола, само неколку часа по одредувањето притвор за тројцата фармери од семејството Илиевски. (А.Б.)