Претходен број

Роми бараат да се изгради теќе на скопскиот плоштад

Ќе има ли место да се задоволат сите барања: плоштадот „Македонија“

На скопскиот плоштад да се изгради Вардали баба-теќе! Вакво барање до Општина Центар неодамна поднеле од „Светиот стол на суфиските еренлери на светот во Македонија“, здружение во кое 70 отсто од членовите и' припаѓаат на ромската популација. Тие инсистираат да им се овозможи изградба на теќето во зеленилото спроти кафулето „Тренд“.

Владимир Тодоровиќ, градоначалник на Општина Центар, најави дека допрва ќе го разгледа барањето и ќе донесе одлука дали врз основа на него ќе предложи измени на постојниот Детален урбанистички план. Со важечкиот ДУП во зеленилото спроти „Тренд“ сега има маркичка за изградба на хотел и административно-деловен објект, а земјиштето е во приватна сопственост. Градоначалникот, не само за барањето за изградбата на теќето туку и за џамијата на која инсистираат од ИВЗ, нема оформено конкретен став, дали е „за“ или против овие објекти да никнат на плоштадот. Смета дека основа за барањата е одржување баланс на верските објекти откако се актуализира и поведе постапка за реализација на владината идеја за изградба на црквата „Свети Константин и Елена“.

„Иницијативата за промена на ДУП во интерес на џамијата ја добивме и прифативме. Се бара на местото на Офицерскиот дом да се изгради џамија. Во меѓувреме, планирам свое видување да кажат и стручни лица, од архитекти до обични луѓе. Во секој случај, дали ќе има промена на планот ќе зависи од одлуката на општинскиот Совет. За теќето, пак, допрва ќе одлучуваме“, дополни Тодоровиќ. (Дс.Т.)